Chapchar Kut sum

Mizote kut neih ropui ber Chapchar Kut chu hlim takin hman zawh a ni ta. Mizoram sorkar chuan Chapchar Kut hmanna atan hian Aizawlah cheng nuai 65 an dah a, Lungleiah cheng nuai nga an dah a, district dangah nuai thum ṭheuh a dah bawk a ni. 

Social media lamah Chapchar Kut sum sem dan hian sawisel a hlawh nasa a, pawl ṭhenkhat phei chuan thuchhuah siamin an dem hial a ni. Mizoram sorkar hian Chapchar Kut atan hian sum a dah tam thei lo ang tih chu kan budget kalphung enin thil chiang sa a ni a, chutihlaia a hman dan kalphung danglam tam vak si loa a sum dah inthlau lutuk hi chu a chang tlem tan vui mai a awl ang. 

Aizawlah ni hnih chhung hman a ni a, a ni khatnaah sorkar hnathawkte pawh kal phalsak ni mah se Lammual a thawl hle a, item nei châmbangte tih loh chu a chhimtu mipui an awm meuh lo. Kan kut ropui tak hi kan hlut avanga a hun chhung pawh sei hi a mipui lam hian kan la zo meuh lo zawk a ang hle mai a; sorkar hnathawk lam lah Chapchar Kut chhuanlama pisa chhuahsan ni si, a lawmna hmun Lammuala kal mang si lo deuh vek an ni tih chu sorkar pisa thawlzia leh Lammual thawlzia aṭangin a lang chiang hle a ni. 

Kan sorkar hotute hian kum dangah pawisa tam zawk an dah thei dawn a nih lo chuan Aizawla ni hnih chhung Chapchar Kut hman hi titawp se, ni khat senso tur hi district dangah sem rual thei zawk se a duhawm khawp mai. Tunah hi chuan kut hman dawn apiangin Aizawl ni lo zawngte an vui zel dawn niin a lang a, an vuivai pawh hi a âwm lo hran lo. Aizawla mipui an tam bik avanga pawisa dah tam fâl angin chhut dawn ila, Champhai leh Lawngtlai-te dawn zat Saitual leh Hnahthial district-in an dawng bawk si a, tehfung mumal a awm lo a ni ber mai. 

Engpawhnise Chapchar Kuta sum sem dan mai ni lo a hman dan thleng hian en uluk deuh a ngai a, kum ṭhenkhata an sum hman dan rinhlelhawm tak angte kha awm tawh lo se, district hrang hranga sum sem dan pawh hi ennawn theih ni se a ṭha khawp mai.