Zirna ina ruihhlo do

Aizawl district bawrhsap hoin tun hnai khan Nasha Mukt Bharat Abhiyan Mizo­ram (Drug Free India Campaign Mizoram) hruaitute an ṭhukhawm a; Aizawl district-a college hrang hrangah awareness campaign neih an rêl.

Ruihhloin Mizo­ram a tihbuai dan leh khawpui mai ni loa thingtlang thlenga a luhchilh dan ngaihtuah hian tun aia nasa zawka ruihhlo do tura ṭan lâk hi a ṭul takzet a, college-a ruihhlo dona kalpui tum hi thil lawmawm tak a ni.

District pakhat mai ni lo, Mizoram chhunga district dangah pawh hei hi kalpui ngei ni se, college zirlaite hnena ruihhlo ṭhatlohna lam zirtir hi a ṭangkai ngei ang.

Zirna in kan tihte hi exam-a chhuak leh tur zirna mai ni loin nun atana pawimawh zir chhuahna hmun a ni tur a ni a, ruihhlo do hi a ṭul takzet avangin zirna inah pawh a bulṭhut aṭangin ruihhlo ṭhat lohzia zir hi a ṭul takzet a ni.

Len deuh hnua ruihhlo khawih ṭan hi awm ve bawk mah se college kal hma aṭanga lo buai tawh mi tam tak an awm avangin nau­pang te zawkte hnena an hriat­thiam dan tawk tura ruihhlo chungchang zirtirna pek hi tihmakmawh a ni ang.