Chapchar Kut versus Zo Kutpui

Mizoram sorkar chuan Chapchar Kut hmanna senso atan cheng nuai 100 a sem chhuak a, heng zinga cheng nuai 65 hi Aizawlah hman a ni a, a bak zawng hi district dang 10 leh Mizoram House awmna khawpui hrang hrangah sem a ni. Hetihlai hian Mizoram sorkar chuan state pawn leh ram pawna Mizote puala a buatsaih, Zo Kutpui tiha a vuhah cheng nuai 100 a dah thung. 

Chapchar Kut pawisa sem dan hian sawi a hlawh hle mai a, Aizawl lama pawisa dah a tam fâl deuh avangin district ṭhenkhat an lungawi lo. Chu mai chu a ni lo a, Aizawla Chapchar Kut sum hman dante thleng hian kum dangah rinhlelhawm khawpa hman a lo awm tawh ṭhin a, chuvangin Chapchar Kut sum hian ngaihven a hlawh ṭhin a ni. 

Hetihlai hian Mizoram sorkar chuan Zo Kutpui tia hming vuahin state pawna Mizo tamna hmunahte leh ram pawna Mizo awm khawmna hmunah puipun a buatsaih a, Tripura leh Manipur-ah hmang tawhin Chief Minister hoa hman a ni nghe nghe. Hemi atan hian cheng nuai 100 sorkar chuan sum a dah thei a ni.

Ngaihtuah ngun ngai ta erawh chu Mizote kutpui ber Chapchar Kutah district ṭhenkhat vui leh vaina thlen khawpa sum a tlem lai a, chuti zat tho hmanna Zo Kutpui buatsaih a ni thei lawi si hi a ni. Zo Kutpui hi thil ṭha tak chu a ni ngei a, nimahsela a Chapchar Kut nena a sum lama intiat renga dah tur chi a ni dawn em ni? A state chhunga mi ngei, a mipuite ngeiin an kut ngaih hlut ber Chapchar Kut hmanna tur an duh ang sum an hmuh loh lai a, kut phuahchawp zawka sum heti zat dah hi a inhmeh reng em? 

Engpawhnise sorkarin state pawn leh ram pawna Mizo awmte a ngai pawimawha an puala sum a dah phal hi a lawmawm a; amaherawhchu Chapchar Kut nen sum inzat chiah dah erawh a inhmeh lo a, Chapchar Kut sum hi tihpun ngei a hun tawh a ni lo'm ni?