Ruihhlo do beihpui thlak a remchang em?

Tun hnaiah Assam sorkarin ruihhlo do beihpui a thlak a, Mizoram aṭanga chhuk thlà lirtheite pawh an lo endik ṭhin. Hetihlai hian Mizoram lam pawhin Vairengte check gate-ah Vai ram lama lirthei chhuk thlà tur hi an endik ve bawk a; state pahnihah ruihhlo tawlh ru eng emaw zat a khat tawkin man an awm bawk.

Mizoramah ruihhlo a hluar hle mai a, kan ṭhalai tam takin nunna an chân tawh bakah ṭhalai tam tak hmantlak lohin an awm mêk. Heti taka min tibuaitu hi thapui thawha beih let chuan awmzia a nei ngei ang tih a chiang a, hri len laia ramri ven ṭhat a nihlai leh, Assam nena ramri boruak awmlai hi a ṭha zawngin a hman remchan theih ngei a rinawm.

Khaw chhak aṭanga ruihhlo lo lut tur ven hi thil harsa tak ni mah se ṭan rual phawt chuan thil theih loh hulhual a nih hmel loh. Assam aṭanga ruihhlo tawlh ruk leh khu lama chhuk thlà tur pawh man chhuah awlsam lai tak a nih hmel a, sorkar hian ṭhahnemngai zawkin he hun remchang hi chuhin ruihhlo do hi kalpui rawh se.