Man theih leh man theih loh

Assam Rifles leh Champhaia Customs department mite chuan tun hnai khan Mualkawi leh Hruaikawn inkar kawngah ram dang siam meizial bawm pui 100 leh bawm mal 45 an man a, a neitua puh an man bawk. Meizial an man hi Rs 1,31,17,000 man hua chhut a ni.

Myanmar lam aṭanga dan loa thil lo lut man a awm fo a, hetihlai hian dan loa lakluh ni ve tho zalen taka lakluh hi a awm ve bawk. Dan thlirna aṭang chuan ram dang aṭanga phalna nei loa zawrh chhawn leh tura thil lakluh, chhiah pawh pek loh hi chu man theih a nih mai hmel a; nimahsela heng an thil lakluh ṭhenkhat hi chu ramria a vengtute an kal pelh hnu hi chuan zalen takin ram chhungah hian an zuar leh thei lawi si a ni.

Ramria insumdawn tawnna lian ber pakhat, ramri hrula mi tam takin an hausakpui tawh chu kuhva raha sumdawnna hi a ni a, hengte pawh hi a ṭhen mansak an nihlaiin zalen taka Assam lam thleng thlenga phurh thlak hi a awm ang lawi a; a khawi chin hi nge dan bawhchhiatna ni a, a khawi chin hi nge phalsak tih pawh hriatthiam a harsa hle.

Heng thil kal velah hian ralkhat aṭanga thil rinhlelhawm hi a inphum tel leh ṭhin bawk a, sorkar phal leh phal loh pawh thliar hran thiam a harsa ta lek lek a ni.

Dan anga lakluh ni si lo, Mizoram chhung a luh hnua zalen taka an kalpui leh zawrh theih thil a awm tlatte hi a mak a, chutiang thil tho chu an man a nih chuan cheng maktadûai chuang mante a ni leh bawk si.

Myanmar leh Mizoram insum­dawn tawnnaah hian a zavaiin dan ang thlapin thil a kalpui theih loh tih chu a chiang a, chutihlaiin state sorkar hian dinna mumal tak nei se, vannei leh vanduai inkara man leh man loh ang mai maia thil kalpui hi a fel lo hle a ni.