Myanmar ramri ven uluk a ngai

Khawvelin a buaipui Coronavirus chu ram 100 chuangah darh tawhin mi nuai khat aia tamin an vei tawh a, thih pui pawh mi 4,000 an hnaih ta hle. Mizoram sorkar pawhin theihtawp chhuahin Coronavirus laka kan fihlim theihna turin ruahmanna hrang hrang a siam. 

Hetihlai hian khawvelin mak a tih em em mai chu Myanmar-in Coro­navirus kai an la nei miah lo anga lang hi a ni a, mi tam ber chuan an thup niin an ngai hial a ni. China nen mel 1,000 chuang ramri an inṭawm a, mihring an inkal pawh reng a, an insumdawn tawn reng bawk a; ram hla tak tak aṭanga China-a khual zin kal chhunte pawhin an vei theih, Myanmar-a mi pakhat pawhin an la vei ve lo hian khawvel huap media hrang hrangah sawi a hlawh hle. Time magazine tarlan dan chuan February 20 khan Myanmar hian Coronavirus endikna khawl hi ram dang aṭangin an dawng ve chauh a ni. 

Hei tak hi Mizoram pawh kan fimkhurna tur a ni. Myanmar-a sumdawngte hian Myanmar siam ni loin China siam thil deuh vek an la chhawng a, China ramrite thlenga kalin China nen an insumdawn tawn ang hial pawhin a sawi theih ang. Anni hi Coronavirus chungchanga ven ngai leh endik ngai ber an nih hmel a, Mizoram sorkar pawhin hemi lam hi a ngaih pawimawh a hun ta. 

Lengpui Airport-a uluk taka endik a ṭhat rual hian, airport lam aia China nen kan inkal pawh nasatnâ Myanmar ramri zawng zawng hi uluk taka ven a, mipui veivakte endik hi a hun tawh hle. 

A lam hnai leh awlsam laia kan inven ṭhat rual hian, kan chân loh khânah hian he hri pui Coronavirus hi a lo lut palh thei a, Myanmar ramri hi ven uluk a ngai takzet a ni.