Tourism hmasawnna turin rilru siam dik

Tourism department chhinchhiah danin tun hnai kum 10 chhungin Mizoramah khualzin (tourist) mi nuai ruk chuang an lo lut tawh a; nimahsela Covid-19 hripui a len hnuah khualzin hi nasa takin an tlahniam a ni.

Tourism depart­ment lam chuan state pawn leh ram pawn lam mi, Mizorama darkar 24 châm tura lo lut chin chu tourist angin an chhiar a; tun hnaiah zawi zawiin khualzin hi pung chho ve zel mah se hmun dang ang bawkin hripuiin a tibuai a ni. Khawvel pum huap pawhin hripui lengin a tihbuai nasat ber pakhat chu tourism industry hi a ni a, Mizoram pawhin hei hi kan tuar viau a ni.

Sorkarin tourism lama hma­sawnna turin tourism project cheng vaibelchhe 1,100 vêl ruahmanna a siam hi a lawmawm a, hei hian rah ṭha a chhuah ngei pawh a beiseiawm. Hetihlai hian khualzin hip tur hian a sak belh leh a siam belh lam aiin kan neih sâ chei bawl thiam leh zawrh chhuah thiam a pawimawh a, hemi kawngah hian Tourism department lamin tun hnaiah nasa takin ṭan an la a, mawi zawk leh tlawh châkawm zawka Mizoram zawrhna lam an buaipui a, hmasawnna lawm­awm tak a ni.

Khualzin hip tak tak tur chuan khawtlang, mipui nawlpui leh kohhran thlenga a inhawn zau deuh emaw, rilru put hmang thlak emaw a ṭul niin a lang a; hmarchhak state dangte neih loh lui mawi bîk leh tlâng säng leh mawi danglam bikte kan neih si loh avangin an neih ve ang tho hmanga khualzin kan hip dâwn a nih chuan khualzin dawngsawng thei tura mipui nawlpui rilru a inpeih a ṭul takzet a ni.

Khualzin tam zawk hip tura hmasawnna ruhrela sum tam zawk kan nei hi a lawmawm rual hian, chu'ng khualzinte a taka dawngsawng thiam tura kan rilru siam dik hi a pawimawh dâwn hle bawk a ni.