Mipui tana awlsamna zawn

Transport department-te mipuiin awlsam taka an dawr theihna tur leh pawisa pek ngaite online hmanga pek theihna tur, 'Online Payment (Citizen Service)' tih chu tun hnai khan Transport Minister-in a hawng. Hemi hmang hian license dil, siam thar tihnun leh ṭul dangte a buaipui theih dâwn a, chhiah chi hrang hrang pek theih a nih bakah passenger transport vehicle neituten ṭul bîk thila an tlan kawng an thlakna tur dilna pawh a tih theih dâwn a ni.

Transport depart­ment-in khawvel thiam­na ṭhang zel hmang ṭangkaia rua­hmanna an siam ta hi a lawmawm takzet a, hei hian mipui hun paih tur tam tak a chhawk bakah office panna senso thlengin mipui tán a tlem phah sawt dâwn a, ruahmanna ṭha tak a ni.

Sorkar a din chhan hi mi­puite tán a ni a, sorkar hna­thawkte pawh mipui rawng­bawltu an ni a, hei hi hre fuh tawk loa sorkarin mipui awlsamna a ngaihtuah duh miah lo te, sorkar hnathawk ni si mipui tana dawr harsa em emte an awm ṭhin hi a inhmeh lo hle reng a ni.

Power & Electricity depart­ment lamin hri len laia in tina kala meter reading an tih theih loh laiin PHE department chuan tui sem an ṭhulh miah lo thung a, Police lamte leh Health Department lama thawktute pawh hna ṭhulh loin an kal thei reng a ni. A sorkar lamin mipui a ngaih pawimawh a, mipui tana awl­samna an zawn na nâ nâ chuan hripui leng karah pawh thawh theih dan a awm tih chu a takin kan hmù mêk a. Covid vanga kan buai mek laiin Transport department-in hripui len hma ai maha kalphung remchang zawk an ngaihtuah chhuak hi a entawn tlak hle.

Tuna Transport department ruahmanna siam thar hian mipui phurrit nasa takin a chhawk theih ngei a rinawm a, mipui tana ding sorkar hian mipui awlsamna siamsak turin ṭan la zel rawh se.