Compensation leh Mizoram

India leh Myanmar insum­dawn tawnna atana Lawngtlai district-a ram pahnih pawhtu tur kawngpui siam mek Kaladan Multi Modal Transit Transport Project (KMMTTP) chu 96.21% thawh zawh a ni tawh a; revised estimate siam leh niin, sorkar laipuiah dilna thehluh a ni.

PWD document-a a lan danin, KMMTTP kawng laihna tura ram lâkah zángnadawmna phûttute ram sawi zau zawng chu sq. km. 25,940.05 a ni a, chu chu Mizoram pumpui zau zawng sq. km. 21,081 aiin sq. km. 4,859.05-in a zau zawk.

Mizoramah hian project lian tham deuh thawh a nih dâwn hian ram lakna tura záng­na­dawmna (compen­sation) pek chungchangah sawi neuh neuh a awm leh ṭhin a, project ṭhenkhat phei chuan a lo ṭhuanawm phah tawh hial a ni.

KMMTTP atana ram neitute compensation an phût dan hi thil mak tak a ni a, chhût chian phei chuan a zahthlak hle a ni. Lawngtlai chhehvel ram zau lem loa zángnadawmna beisei avanga an ram hauh zat chu Mizoram pumpui aiin a area a zau zawk a, hei hi chu a ram tan pawh a mualphothlak thei hial a ni.

Hetianga thil fel lo taka a kal dawn hian a ram neitu lam thiam loh a ni vek bîk lo a, a ram tehtu sorkar mi leh sate pawh hi an inrawlh ve chawk a ni. Ram bial zau vak loa Mizoram area aia tam ram tehchhuaktu leh sorkar dan anga ram petu an lo awm a nih chuan an thiam lo hle tihna a ni a, chumi piah lama mahni area aia zau hauh tuma ram awm lo thlenga ziah luhtirtute pawh an demawm hle.

Tun hnaiah Mizo­ram hmun hrang hrangah kawngpui laih mêk a ni a, kawng sial tuma ruahmanna pawh a awm mêk. Hengahte pawh hian a hmaa ram neitu ni lem lo, compensation beisei vanga ram lei tur zawngte leh a document ringawt lei tur zawng an la awm lehzel hi a vanduaithlak khawp mai. Mahni ram ni lo hauh tuma hmalak te, dik lo taka zángna­dawmna lakte hi a Kristian lo a, a Mizo lo hle bawk.