Mipui demawm hmain sorkar che ṭhin se

Mizoram sorkarin Coro­navirus laka mipui an him theihna turin ruahmana hrang hrang an siam a, Chief Minister hoa mi pawimawhte an ṭhut khawm niin thuthang hrang hrang avangin Aizawlah nitin mamawh mipuiin nasa takin an inchuh a. Buhfai leh ei chawp thil an lei nasa a, dawrkai ṭhenkhatin thil man pangngai aia toin an hralh nia sawi a awm bawk. 

Coronavirus hri leng avangin state pawn lam leh ram pawn lam mite lo luh khap tur rel a nih rual deuhthawin kawngpuite an khar vek dâwn angin social media lamah thu a thang chiam a, buhfai leh nitin mamawh chu hun reilote chhungin an inchuh zo deuh vek a ni ber. Mi tam takin a hlawma leiin a mamawhte lei mai tur awm tawh lo khawpin a awm hman a ni. 

He tih hunah hian mipui hi kan indem mai ṭhin a, an demawm rualin hei hi chu mihring zia a ni ber mai. Ṭhenkhatin Mizo ze ṭha lo bîk anga sawite kan awm a, thlirna tlâng dang aṭang chuan Mizo ze ṭha lo bîk lam aiin mihring ze pangngai a nihna chin pawh a awm thei awm e. 

Mipui hian hetiang hunah hian kaihruaitu leh khuahkhirhtu an mamawh a, sorkar aṭanga lehkhaa thu­chhuah siam ringawt chu a tawk lo tih a takin a lang. Ruling party lam demna chi a ni lo a, a nihna takah chuan a district mawhphurtu lamte chet hun a ni a, an che muang hret niin a lang. 

Aizawl DC-in thil awm theite hrethiamin ruahmanna fel tak lo nei lawk se, thuchhuah piah lamah dawr tamna deuhah a vengtute indahin thil lei leh hralh theih dante bithiah hman se, he buaina hi harsa lo taka pumpelh theih a nih a rinawm.