Boundary Committee leh ramri
Mizoram ramri ngaihtuahtu Boundary Committee chu tun hnai khan an ṭhukhawm a, an chairman Deputy Chief Minister chuan Innerline of 1875 chu Mizoram ramria an pawm thu leh chutah chuan an la ding reng tih a sawi a, ramria police duty-te chu Mizoramin a thlamuanpui thu a sawi.
Ramriah buaina chhuak neuh neuh a awm a, Assam police lamin an thih phah hial avangin Mizoram leh Assam ramri buai hian tun hnaiah ngaihven a hlawh hle. Silai hmeh puah a ni a, Assam lamin nunna hial an chân avangin keini lam hi chak zawka inngaih mai a awl hle a; nimahsela a nihna tak kan pawm duh chuan silai hmeh puah hmaa kan thlen chin bak kha hma kan la sawn lo.
"Kan ramri" tia kan pawm chin phei chu tuna buaina bul hnai mai pawh ni lo, he buaina aṭanga kilometre tam taka hlaah daih a la awm a, kan ramria kan pawm leh 'ramri buaina' tia kan sawi awmna hi chu a inhlat hle. Chumiin a entir chu Mizoramin kan ram chin hi zau tak kan chân mek tawh tih a ni a, tun hnaia Vairengte daia buaina chhuahna hmunte hi chu kan ram chhung thûk tak a ni zawk.
He ramri buaina, hun rei tak lo inmung tawh chinfel tum hian Boundary Committee din a ni ta a, ramria buaina chhuak chin chu state pahnih hruaitute inbiak hnuah tunah chuan a boruak a ziaawm rih a; nimahsela Boundary Committee din a nih chhan 'ramri buaina' tak erawh chinfel a la ni lo a, kan ramri pawm chin kan la sawi thleng chauh a, hmabak a la tam hle.