Thu dik lo theh darh

COVID-19 chungchanga thu dik lo theh darhtua puh Aizawla mi 11-te chu police-te'n an man a, mi dang inhnamhnawihte pawh man tumin an chhui zui mek. Police thuchhuah tarlan danin, March 9 khan Whatsapp-ah COVID-19 con­firm case pakhat Aizawlah a awm tiin an thehdarh a ni. 

COVID-19 chung­chang kher loah pawh thu dik lo thehdarh hi a tam ṭhin hle mai a, hengte hi social media kal tlanga thehdarh deuh vek a ni. Social media-ah thil finfiah loh thehdarh a ni ṭhin a, heng thilah hian a tira a message ziaktu a ni emaw, a lo thehdarh chhawngtu pawh ni se hremna inang khata hrem vek theih an ni tih kan hriat a ṭha hle. 

Tun ang hun, hri a len lai phei chuan mipuite kan fimkhur a ngai takzet a, midang tichiai thei leh tihlauthawng thei thil thehdarh loh hi a ṭha khawp mai. Hei bakah hian khawilai news website leh channel-a mi pawh ni se, a chanchin kimchang ni loa chhumbung deuh deuha thehdarh te, mipuite tana a hlauhawm chin ringawt zawnga thehdarhte hi sim a ṭha khawp mai. 

Mizoram police lamin thu dik lo theh­darhtute rang taka an man hi a lawm­awm a, heng mite hian an thil tih pawizia an hre phak kher lo thei a, sual vang leh rilru chhia put vanga thehdarh pawh a ni lo ang; nimahsela hriatlohna vang hian thil tihsual palh theih a ni a, social media hman danah fimkhur tlang ila, COVID-19 boruak hi social media hman sual pawizia hriat chhuahna atan i hmang ang u.