Hri leng leh media

Coronovirus (COVID-19) hri leng avangin khawvel pum a buaiin a chiai a ni ta ber a, a vei hmuh chhuah tam dan hi a tir lam aiin tlahniam ta deuh mah se, khawvel hmun dangah a darh zau zel avangin sorkar hrang hrang pawh a inralring a, India sorkar leh Mizoram sorkar pawhin ruahmanna hrang hrang a siam a ni.

He hri hlauhawm tak chanchin hi internet-a kan hmuh phak ang ang lak khawma thehdarh nghal maite kan ching a, a ṭhente phei chuan eng chiah nge a tih hrethiam mang lote pawhin kan thehdarh mek niin a lang. Kan thil thehdarhte hi khawi website 

aṭanga lak nge ni a, khawi news channel-a chhuak nge a nih lam kan finfiah loh chuan, he hri avanga 'insawiṭhaih' ang lekah kan chhuak palh thei a ni.

Hei leng reng reng hi a nihna baka hlauhawma mipui hriata thehdarh loh tur a ni a; chumi lehlamah chiah chuan, a hlauhawmzia hi mipui lakah thup tur lah a ni hek lo. He hri hi a lo luh palha a nghawng pawi theih dan hre chunga kan sorkarin ṭan a la zel hi a lawmawm a, tun aia chak zawka ke a pen pawh a la ṭul zel ang.

Hetih lai hian, Coronovirus hi thih ngei ngeina a nih loh thu te, a vei apiangin an thihpui lo mai ni loin, kum upa lam, chak lo zawk leh hrisel lo zawk mi tlemtêin an thihpui a ni tihte pawh sawi tel a pawi lo ang. India ram mipui tluklehdingawn khat aia tamah hian tun thleng hian thihpui an la awm lo a, a vei zat pawh mi 50 an la tling lo tihte pawh mipui zirtir tel a ṭha.

A hlauhawmna kan sawi rualin, a nihna tak sawia kan rin ang em ema a hlauhawm loh dante pawh sawifiah tel a ngai a; chutih rualin, mipuiin an zuam ngawt lohna tura a hlauhawmna lai erawh sawi tel a ṭul si. Hetiang hunah hian media-te an pawimawh em em a, mipui hriata puanzar tur ṭul leh ṭul lo chin thliar thiam hi a pawimawh tak zet a ni.