Hri do dan kalphung

Mizoram sorkar chuan Covid-19 hripui darh zel avangin partial lockdown a puan mek chu September 18 thleng a pawt sei. Hemi hnuaiah hian Aizawl Municipal Corporation hnuaiah zan lamah curfew puan a ni bawk a, sumdawnna dawrte a inchhawka hawn a ni a; thingtlang hri awm lohna hmunah sikul kal theih a nih bakah biak-inte pawh hawn a ni tawh thung.

Hun eng emaw chen chu hripui kan do danah hripui tamna hmunte leh hripui la luh ve miah lohna khuate kha inang khat deuh veka hrut rual a ni a, hri awm lohna khuaah pawh inkhawm leh sikul kalte phal a ni lo. Hun rei tak kan inkharkhip hnuah pawh hri kaiin kiam lam an pan thei si lo a, ruahmanna thar chi hrang hrang siam a niin tunah chuan hri awm lohna khuaahte chuan kalphung hran an nei ta a, hei hi a finthlak hle a ni.

Hriin min luhchilh tawh hnu hi chuan inkharkhip hmanga hneh chi a ni lo tih chu a takin kan zir chhuak mek zel a, kan duh emaw duh lo emaw 'hri nena len dun thiam' an tih kha zir a ngai ta a ni ber mai. Khawpuiah pawh inkharkhip leh hnathawk thei loa kan indan beh chhung zawng khan hripui kan dang bet zo si lo a, inkhuahkhirhna thlahdul a nih leh hnu hian a hma aiin hri vei an pung hluaiin a lang lo a, hri a tlahniam hek lo.

Thil mak tak chu kan ṭhenawm state-te hi keini angin an inkhuahkhirh ve lo a, keini aiin an inthlahdah nia a lang chung hian hri vei hi an tlahniam chak hle a; kan lockdown dan en hi chuan India rama hri kai tam zinga kan tel hi kan inhmeh lo hle a ni. Kan hri dona hmanraw hman tawh lockdown leh partial lockdown hi kan dampui lem lo a, a dona hmanraw dang kan hriat mai loh avangin kan dampui lem loh hi kan la hmang nawn zel dawn niin a lang.

Engpawhnise sorkarin hripui darh zel lohna tura ruahmanna a siamte hi zawm ṭha tlang ila, a ṭul hunah mahni chhungkua ṭheuh 'in-lockdown' mai zel ila, sorkarin min venpui sen tawh loh avangin a him leh him lo thliar thiam turin mahni kan pawimawh zual ta hle a ni.