September 18 hnu lama awm dan tur

Mizoram sorkar chuan Covid-19 chungchanga inkaih­hruaina August 22 - September 4, 2021 chhunga hman tur Standard Operating Procedure (SOP) a duan chu September 18 thleng hman chhunzawm turin a pawt sei leh ta a; Mizoram chhung hmun ṭhenkhatah partial lockdown kalpui zel a ni ang.

Covid-19 hian Mizoram chang ni loin khawvel pum a tibuai mek a, ram changkang leh hausa tia kan hriatte pawh an buai phah hle. Hri dona atana kalphung ṭha nia an sawi pawh a khat tawkin an thlak danglam reng a, hri len tirha a dona kawnga che ṭha nia sawi ram leh state-te pawh an che ṭha tluantling lo a, chutihlaiin hri len tirha mualpho khawpa talbuai ram leh state ṭhenkhat chu nasa takin an insiam ṭha a, hri hi an hneh titih thei tawh hial a ni.

Hetihlai hian Mizoram chuan hri len tirh aṭang tawh khan a dona hmanraw hman thiam laklawh pakhat kan neih hi kan la hmang chhunzawm zel a, chu chu lockdown leh partial lockdown hi a ni. Hei hi hun rei tak chhung chu kan ṭhatpui hle niin a lang a, sorkar tha piah lamah a aia chak leh thahrui ngah zawk khawtlang tha nen ṭangkawpin Task Force lamin hlawh pawh nei loin mahni veng leh khua ven hna an thawk a, an hna an tlinin an fakawm hle a ni.

Nimahsela tuna lockdown leh partial lockdown ringawt hi chu kan dampui zo lo niin a lang ta a, hri leng hian zual lam pan zel se engtin nge kan sorkar hian hmalak a tum? Hri leng hi tlemin ziaawm leh deuh se, engtin nge kan kal zel ang, tihte hi zawhna inzawh ṭul tak, a chhanna kan neih sa loh pawha ngaihtuah lawk ngai a ni.

September 18 thleng inkaihhruaina kan nei tawh a, hei hi a nihna takah chuan August 22-a hman ṭan daih tawh kha niin thla khat dawn chu a ngai kan hmang dawn tihna a ni.

Kan hri hi engtin zel nge a awm dawn kan hriat loh avang tak hian theih tawpa inbuatsaih lawk a ṭul a, khawtlang leh kohhran hruaitute nena inkokhawm duaha ngaihtuah chiam kher lo pawhin mi­thiamte'n kan hmalama kal dan tur hi lo ngaihtuah lawk thei se a ṭha ngawt mai.