Mizoramah hri kai an pun zel avangin RT-PCR laboratory mamawhna a sâng

September 6, 2021 khan Mizoramah Covid-10 positive 1,468 hmuh an ni a, hei hi ni khata hri kai hmuh chhuah tam ber an ni. An zinga 1095 zet hi Rapig Antigen Test (RAT) hmanga hmuh an ni a, 314 hi RT-PCR hmanga hmuh niin a dang zawng hi TrueNaAT leh PAI hmanga hmuh an ni.

Vanduaithlak takin Mizo­rama district 11-ah hripui kai hmuh chhuah an ni a, an hmuh tlemna ber Hnahthial district-ah pawh positive 10 hmuh an ni hian he hri hi Mizoramah a darh nasa ta hle tih a nemnghet awm e. Mipui nuai 11 vel lek awmna ni si hi India ram pumah pawh ni khata positive hmuh chhuah tam zingah kan lang ta zel a, active case nei tam zingah kan lang ta deuh reng bawk a, a zialo hle a ni.

Heti chung hian mithiamte'n Covid-19 hri endikna atana rintlak bera an ngaih RT-PCR khawl bun theihna laboratory nei tlem ber state kan ni a, pakhat chiah kan la nei. He thil hi sorkar-in a mipuite a ngaih pawimawh lohzia lantirna a ang ta lek lek mai a, hripui len laia a endikna khawl bun theihna ngaihtuah theih reng a nihlaia ngaihtuah duh miah loh hi thil dang intihsak duh loh ang mai mai a ni lo a, a vanduaithlak takzet a ni.

Mizoram sorkarin hripui kai endikna atana a hman tam ber chu RAT a ni a, hei hi a dik famkim tawk lo a ni mai lo a, a sorkar ngei pawh hian thil ṭhenkhatah hian RT-PCR negative certificate kher phûtna hi a nei hual tawh a ni. RT-PCR khawl bun theihna laboratory hi a hranpa an sa thei lo a nih pawhin motor-a bun fel sa lei theih mai pawh a awm reng a, ṭhenawm state hri vei nei tlem zawkte pawhin an lei tawh a, keini chuan ZMC-ah bak RT-PCR hmangin hri hi kan la endik ve thei lo.

RT-PCR khawl hman theih loha a awm chhan hi pawisa kan neih loh vang lam ni loin Mizoram sorkarin a ngaihtuah duh loh vang niin a lang a; state sorkarin pawisa a nei lo a nih pawhin sorkar laipui aṭanga Covid-19 avanga kan sum hmuhte pawh hian laboratory hi din theih a ni a, laboratory keng tel lirthei pawh hi a lei zo em em a ni.

Mizorama hripui a ni tela a pun chhoh meklaia hri dona kawnga kan chet ṭhatna sawi a, RT-PCR khawl bun theihna laboratory din belh duh miah loh hi chu mipui zahlohna rawng kai a ni a, mipuiin an hre reng ang.