Budget piah lam sum

Mizoram chief minister chuan, "Central lamah pawh sum kan dil a, Pathianin mal min sawm a, beisei loh lam aṭangin cheng vaibelchhe tél a rawn lut mek zel. Ka hriat rûk danin, Amit Shah-a'n ministry hrang hrangte hnenah 'Mizoram ngai pawimawh rawh u' a ti emaw ni, min ngai pawimawh," a ti a; nimin lawkah pawh cheng vbc. 4000-5000 vel hmuh a nih thu a sawi. Chief Minister chuan, "Central sorkar khu kan sum hnár an ni a, kan mamawh a, min mamawhna chin pawh a awm ve. State budget piah lam sum min pe mek zel hi a lawmawm hle a ni," a ti.

Kan state chief minister berin sum ṭhahnem tak kan dâwn belh thu a sawi ta zauh zauh a, Assembly House-a a sawi mai duhtawk loin hmun dangah pawh a sawi ta zel a, hei vang hian pawisa hi kan hnianghnar chho dâwn ni ngeiin a lang. Kan state budget pangngai kan en chuan kan pawisa zawng zawng deuhthaw chu sorkar inrelbawlna leh sorkar hnathawk hlawhah a kal ral nghal dâwn tih a chiang a, mipui an beidawn ruk laia budget pawn lam aṭanga sum lo lut tur hi a lawmawm hle a ni. 

Heng pawisate hi eng atana min pek nge ni a, eng atana hman tur nge a nih a, eng ang pawisa nge a nih mipui lam chuan kan la hre lo. Central sorkar hian pawisa hi a thei sem ngawt ngai lo a, eng project tán bîk emaw a rawn pe 

ṭhin a, chutah pawh chuan state tum tur hi a awm ve bawk ṭhin. Tun ṭuma vaibelchhe 5,000 vêl zet, kan budget pumpui zatve deuhthaw min rawn pe mai hi a makin a lawmawm a, a hman dan kalphung hriat chian a chakawm tawh hle. 

Engpawhnise kan budget en khan lungawina tur a awm lo a ni ber a, tuna budget pawna sum hi a peka min pek, kan thawh belh ve emaw kan pek kir ve emaw ngai lo a nih chuan Mizoram tan malsawmna ropui tak thlen thei a ni ngei ang.