Lui dunga nungcha humhalh

Fisheries department leh Central YMA-te chuan Mizoram lui dunga nungchate ṭha zawk leh awmze nei zawka humhalh a nih theihna turin tun hnai khan thawhhona thuthlung an ziak.

Mizoramah hian lui ṭha tak tak kan nei a, hengah te hian nungcha chi hrang hrang awmin ṭha taka humhalh chu ni se mi ṭhahnem tak tana eizawnna tling a nih piah lamah nungchate pawh an him zawk ngei ang tih a rin theih. Tunah erawh hi chuan khawtlangin an humhalh lohna hmunah luia nung­chate bomb emaw, tur hmang tea hrai leh generator leh thil dang hmanga suasam a ni fo a, kan nungchate ṭul loah kan suat tam hle a ni.

Khawtlangin an humhalhna hmunah erawh sanghate pawh lian ṭha tak tak lui dungah hmuh tur an awm tawh a, hmun ṭhenkhatah phei chuan khualzinte ennawm tling phak turin an humhalh hial a ni. Khaw tam takin an khaw ram lui dunga sangha leh nungcha dang man an khap tlat a, hei hian rah ṭha a chhuah mek. Hetihlai vek hian mahni rama nungchate dimdawi nachang hre lo, hmasial taka dan phal loha ei tur zawnga nungcha suasam ṭhin an la awm hi a vanduaithlak takzet a ni.

Lui dunga nungcha kan humhalh hian an dam khaw chhuahna ngawr ngawr kan ngaihtuahpui rual hian mihringin eizawnna atana kan hman theih dan pawh ngaih­tuah tel theih ni se, dan hnuaia sangha, kaikuang, cheng­kawl, chakai leh nungcha dangte pawh man theih dan awm tel se, sorkar hian ruahmanna fel tak siam thei se a ṭha khawp ang.

Kan rama pawl lian leh zahawmin sorkar nena thawkhoa lui dunga nungchate humhalh kawnga thawhhona thuthung an ziak hi a lawmawm a, hei hian rah ṭha pawh a chhuah ngei a beiseiawm.