Hnathawk thei leh thei lo
Power & Electricity Minister chuan Assembly House-ah electric bill lailawk (provisional bill) siam chungchang a sawifiah a. Covid-19 khuahkhirhna khauh tâk hnuaiah meter reader-te'n energy meter reading an ti thei lo a, hei vang hian a hma thlà thum bill average lain provisional bill hi siam a ni a, hei hi an electric hman zat tak tak aṭanga la siam rem leh tur a ni, tiin a sawi.
Covid-19 hi thil engkimah chhuanlama hman remchang tak a ni a, sorkar meuh pawhin thil tih fel loh chhuanlamah a la hmang dâwn chauh mai thei a, a intiam tawhte tihhlawhtlin loh chhan chhuanlamahte pawh a la hmang hial ang. Hna ṭhenkhat thawhna tura sorkarin sum a neih loh chhanah Covid-19 puh a ni tawh bawk a, chutihlaiin Covid-19 hripui kan hlauh vanglai ber pawha hnathawh chawl ve reng reng lo, sum lama buai ve miah lo sorkar hnuaiah tho an awm bawk.
Hripui kan hlauh vanglai takin bawnghnute semtute'n an hna an ṭhulh miah lo a, anni hi an peknate ina lut emaw, an kawtah bura bawnghnute pe ṭhin an ni a; chanchinbu semte pawhin an hna hi chawl loin an kalpui thei reng a ni. Sorkar hnuaia thawk zingah pawh Police lamin an hna an kalpui reng tho a, Health department lamin chawlh an nei ve lo a, hei bakah hian bank lama thawktute hian an hna hi ṭha takin an chhunzawm reng bawk.
Mi ina kal kual chi ve tho PHE tui semte pawhin ṭha taka tui an sem theih reng lai a, Power & Electricity department lamin energy meter reading an kalpui thei tlat lo mai hi a pawi a, chumi nghawng zela chhungkaw tam takin loh theih loha bill säng zawk an pek a ṭul phah hi a pawina belhchhahtu a ni.
Hripui avangin chhungkaw tam takin hna an thawk thei lo a, sum lakluh pawh an neih lohlaia sum tam tham chhuahna siamsak hi mipui phurrit siamna a ni a, nakina siam rem leh tur pawh ni se tuna phurrit an phurh hi chhungkaw tam tak tán buaina tham a ni.