Inbuatsaihna chi dang

Khawvel tibuaitu coro­navirus vei chu India ramah mi 100 chuang an awm tih hmuh chhuah a ni ta. Khawvel pumah mi 1,50,000 chuangin vei tawhin mi 5,700 zetin an thihpui tawh a ni. 

Coronavirus hi a darh zau telh telh a ni ber a, India ramah ngei pawh a darh chakin thihpuite pawh an awm ve ta hial. Mizoram sorkar pawhin theihtawp a chhuah a, Mizorama coronavirus a lo luh lohna turin ṭan an la chho mêk. Tuna sorkar ṭan lâk dan hi a lawmawm rualin ngaihtuahna zau zawk nen, 'He coronavirus kai hi lo awm ve ta se engtin nge mipui kan zirtir zel ang,' tih lam hi sawi uar a ṭha khawp mai. 

He hri hlauhawm tak hi Mizorama lut lo turin kan inveng a, kan ṭawngṭai a, theihtawp kan chhuah chung hian a lo lut palh thei tih erawh kan pawm ngam a ngai. Social media hmang nasa kan nih avang hian Covid  19 vei pakhat lek pawh awm ila nasa takin kan hlauthawngin ṭul lo thleng thlengin kan buai phili palh thei a, chumi atana inven lawk chu a finthlak ang. 

Coronavirus a lo luh lohna tura kan inbuatsaih rual hian, he hri hlauhawm hi lo lut ve palh ta se a damlo enkawlna piah lama mipui zirtir zel dan tur hi tun aṭanga puanzar a hun tawh hle a ni.