Kawngpui chhiat chhan

Assembly session neih zawh takah PWD changtu Chief Minister chuan Mizorama kawngpui tlo loh chhan leh chhiat hma chhan zawhna chhangin chhan hrang hrang a sawi lang a - ruah tui tla tam lutuk, lung chang ṭha tawk lo, alkatra (bitumen) ṭha tawk lo leh tuiin a chiah avanga tlo lo, contractor thiam loh, engineer thiam lohte a nih tel vek thu a sawi a; cement concrete-a kawngpui siam an uar chhoh deuh deuh thu a sawi lang tel.

Kan ram hotupa berin kan rama kawng­pui chhiat hma chhan a sawi hi a dik vek mai a, chhan pakhat vanga chhia ni loin thil hrang hrang fuh tawk loh vanga kawngpuite hi tlo lo a ni tih hi a dik. Ruah tui tlak tamna state kan nih vangin hmun dangte aiin kawngpui a chhe hma deuh hi a mak lo. Kan lung a chang ṭha tawk lo tihte pawh hi a dik vek a; nimahsela keini ang bawka tlang ram leh ruah tui tlak tamna state-ah an kawngpuite hi a chhe vek lo a, hei vang hian kawngpui chhiat chhan lian zawk hi a awm a ni thei em?

A finfiahna awm hleithei si lo, tlangkam titi leh a hre deuhte'n an sawi fo chu contractor-te kan ngam lo ṭhin leh an duh anga a viltu lam an thunun theih ṭhin avangin kawngpui siam a chhia tih hi a ni. Hei hi titi satliah anga nam liam mai theih a nih rual hian kan kawngpui ber a chhe hmain a tlo thei si lo a, a siam dan tura duan sa thlap hi zawm loin a hmanraw hmante thlengin a ṭha tawk lo a ni thei a, a viltu lam an lo khawng hleithei lo a nih phei chuan kan kawngpui chu tlo ngaihna awm lo ang.

Engpawhnise inpuhna leh rinthu sawi hmanga kan kawngpui chhiat chhan chhui zui chiam ai chuan, "Sorkar laipui aṭanga sum lo kal hi kawngpui ṭha leh tlo siamna atan a ṭha tawk lo zawk em ni?" tih zawhna hi kan hotute hian an zawh a ngai.

Ministry of Road Transport & Highways-in kawngpui siamna tura sum min pek hi kan state atan hian a tawk ve lo nge, kan sum hmuh ang a nihna tura kan hman tâwk loh avangin kan kawngpui hi a tlo lo zawk?