Kohhran inkhawm leh hri leng

Mizoram Kohhran Hruaitu Committee chuan Coronavirus hri leng mek avangin kohhran hrang hrangte ṭawngṭai rual turin a ngen a, hei bakah hian, "Mipui kan him tlanna tura sorkar hmalakna leh ruahmannate ngaipawimawha zawm ṭheuh turin mi tin kan ngen a ni," tiin thuchhuah an siam. 

Tun ṭuma hri leng hi a dan a dang deuh a, mihring aṭanga mihringa inkaichhawn theih a ni a, a inkaichhawn dan a awlsam em avangin sorkar lam pawh a fimkhur hle. Khawvel ram changkang zawkte pawhin Covid 19 laka himna tur hian ruahmanna hrang hrang nei bawk mah se, an hmanraw hman pawimawh ber chu puipuina tihtawp a ni deuh ber mai. 

Mizoramah pawh sorkar ruhmanna angin puipunna hrang hrangte chu tihtawp a ni nual tawh a, infiamna lam te, zirna inte leh tlawmngai pawl hrang hrang puipui programme duan lawkte pawh ṭhulh a ni tawh. Hetihlaia mipui titia bet ve reng pakhat chu kan puipunna lian tham tak pakhat Pathian biak inkhawm chungchang hi a ni. 

'Inkhawmte chu Pathian be tura kal khawm a ni a, Pathian engkimtithei chuan amah be tura kalte chu he hri lakah hian a veng ang,' tiin ngaihdan a awm thei a, hnial vak chi pawh a ni kher lo ang. Chutih rual chuan vana cheng kan la ni lo a, he leia hri inkai darh dan pakhat chu mihring pungkhawm hi a nih miau avangin hri len chhung na na na chu kohhran inkhawm tihtlem emaw, khar lailawk emaw ṭha zawka ngai an awm ve bawk ang. 

Sakhaw thil a ni a, Pathian biakna chungchang a nih avangin sorkar chuan a khapin a khuah­khirh hauh dawn lo tih a chiang. Chutih rualin MKHC ngei pawhin sorkar hmalakna leh ruahmannate zawm tura mipui a ngen zingah khian puipun huai­hawt loh pawh a tel. Engpawh­nise hetiang hri leng hi kan vawi khat tawnna a ni mai thei a, 'Tun hma pawhin biak-in kan khar lo,' tih ringawt chu ṭan chhan ṭha ber a ni lo thei a; mahni kohhran 

ṭheuhah ngun takin ngaihtuah se, kohhran tana ṭha ber turin kohhran hruaitute'n hma an la zui turah i ngai phawt ang.