Aizawl khawpuiah kawng chhawng siam leh lei verh

Chief Minister chuan Aizawl khawpui hnuaia lei verh tum a nih thu Assembly session-a zawhna ziaka a chhannaah a sawi a, "Aizawl khawpui hnuaiah lei verh tumna a awm e. Aizawl by-pass road siam nana verhna tur hmun ṭha NHIDCL survey tir mek a ni," a ti.

Aizawl khawpuiah hian kawng chhawng siam tum a ni a, hei hi kum 2018 Assembly inthlan hma aṭang tawha tuna kan Chief Minister-in a sawi tawh a ni a, sorkarna an chan hnuah pawh kawng chhawng siam tum a nih thu hi a sawi tawh. Heta kawng chhawng a siam hi chu kawngpui lûnlai leh kawn chunga lei sei tak dawh (flyover bridge) ang ni lo, kawngpui chunga kawng dang awm (elevated highway) a ni a, an siam zawh phei chuan India ram khawpui zinga traffic jam awm lohna khawpuiah Aizawl hi a chhuah theih a ring a ni.

CM berin kawng chhawng siam tumna a nei leh, a siam dan tur thlenga ngaihtuahna a lo sen tawh thute kan ngaithla ṭhin a, a ban inphun dan turte thlenga a sawi tawh avangin kan la nei ngei turah ngai ila, a puitlin hunah chuan hun leh sum tam tak khawhralna traffic jam hi a ziaawm ngei ang. Thil hi chu a ti thei dinhmuna dingte'n an tum tlat chuan a theih mai zel, India ram khawpui dangah pawh kawng chhawng (elevated highway) hi hmun tam takah sei tak tak an siam thei a, Mizoramah pawh hian kan la hmuh ve thuai i beisei ang.

Mipui vantlang hmaa kan Chief Minister-in a sawi lan vak loh, Assembly House lama zawhna ziaka a chhânnaah Aizawl khawpui hnuai lei verh (tunnel) siam tumna pawh a lo awm leh zel a, hei pawh hi tihhlawhtlin a nih chuan thil ṭha leh ṭangkai tak a ni ang. Aizawl khawpui hi a tawtin kawngpuite pawh lirthei kal hleihtheih lohin a awm tawh a, heng kawngpui chungah kawng chhawng kan neih a, a hnuaia lei verh a nih theih chuan khawpuia cheng mipui tan chuan thawk huaina tham a ni ngei ang.

Heng ruahman­nate hi kan state hotupa berin a sawi chhuah tawhte a nih vangin a hlawhtling thuai turah ngai ila, a hlawhtling lo palh a nih pawhin chhuan­lamah, "Covid-19 hripui a leng a," tih erawh a remchang lo ang. Thil tih theih loh chhuanlamah hripui leng hi puh a remchang hle dawn a, hei hi kum 2023 inthlan dawna tute emaw chhuan­lam ber tur a ni palh thei a; nimahsela Covid-19 in a nghawng chin leh nghawng loh chin hi chu mipuiin an thliar thiam dawn a, pawisa kal dante pawh hi mipui hian an hmu thiam sawt viau a ni.

Kawng chhawng siam tumna hi sorkar hian chak takin bawhzui se, tuna lei verh tumna lo awm thar ta pawh hi hlawhtling thei ngei se. Aizawl khawpuiah hian kawngpui pangngai, kawng chhawng (elevated highway) leh lei hnuai kawng (tunnel) a awm theih chuan traffic jam awm lohna khawpui a nih theih a beiseiawm hle.