Covid 19 vei leh vei lo enna

Health Minister chuan tun hnai khan thuthar thehdarhtute hnenah Coronavirus leng mek chungchanga sawrkar inpuah­chahna a hrilhfiah a; a thusawi zingah Coronavirus rinhlelh test na tur khawl Mizoramin kan neih loh pawh a ṭul anga bawhzuia neih tum a nih thu a sawi. 

Covid 19 leng mek avangin India ram mai ni lo khawvel puma chiaiin a ralkhel chu a ni ta ber a, mipuite chiai lo tura ngenna chhuah chiam mah se sorkar hrang hrang pawh a che vel leh a inbuatsaih danah a chiai tih hai rual a ni lo. Nun dan phung a khaihlak a, mipui an buai a, thihna thlen thei leh inkaichhawn awlsam tak Covid 19 hian khawvel nunphung a tibuai nasa ta hle. 

Hetihlai hian Mizoramin tun thlengin Covid 19 vei leh vei lo endikna a la nei lo hi a veiawm a, Health minister-in lei tuma hmalak a nih thu a sawi erawh a lawmawm hle a ni. Covid 19 enna khawl (test kit) hi awlsam taka neih theih mai a ni lo a, a endikna hi lei pawh ni se laboratory ṭha leh changtlung tak tel lo chuan a hman theih loh a, fimkhur taka mithiam bikte'n an hman tur chi niin an sawi. 

Sorkar hian a leina lo nei pawh ni tehreng se, a endikna tur hmun, a endiktu mithiam leh a kalpui danah thil tih ṭul tam tak a la awm a ni awm e. Engpawhnise a harsatna lam thlir chuan harsatna tam tak a awm ngei ang a, tunah erawh chuan indona hmuna awm ang deuh kan nih tawh avangin a ṭulna lam ngaihtuaha lei phawt mai hi mipui thlamuanna atan pawh a ṭha awm e. 

Ṭhenawm state-a medical college nei upa deuh tawhte leh a hmanraw dang nei ṭhate'n an nei tawh si a, Covid 19 vei leh vei lo enna khawl la nei lo state tlemte zinga tel ve reng tawh lo hian, sorkar thuneitu lam hian Health minister sawi angin Covid 19 vei leh vei lo enna khawl hi lei phawt mai se a ṭha ang.