Myanmar raltlan

Myanmar ram chhung Chin state-a Myanmar sipaite leh tualchhung mite tun hnaia an inbeih thar leh hnuah Mizoramah raltlan an rawn luh belh zel a, an luhna khawtlangte'n theihtawp chhuahin chhawmdawl hna an lo thawk a ni.

Myanmar sipaite leh tualchhung mite inbeihna hian zual lam a la pan zel avangin raltlan hi an lo la lut dawn chauh mai thei a, tuna ramri bul hnai khuate'n an chhawmdawl ang hi kalpui reng theih a nih dawn loh avangin sorkar pawhin ruahmanna fel zawk a neih thuai a ngai dawn a ni. Tun hnaiah sipaite leh tualchhung mite inkarah inkahna a thlen thar leh tak avang hian sorkar sipai lamte hi engtik lai pawha rawn thawk leh thei reng an ni a, hei vang hian nunau leh tarte tan chuan sahimna zawnga tlanchhiat mai loh chu duhthlan tur a vâng hle ang.

Ṭiau lui lehlama awmte hi khawvel danah chuan ram dang mi mah ni se kan unaute an ni a, harsat mangan an tawha tuam hlawmtu tur chu keini hi kan ni. Kan chipuite ni lo pawh ni se indona leh buaina avanga raltlan hi chu khawvel danah pawh ṭha taka lo dawngsawng tur kan ni a, anni kan lo chhawmdawl hian kan tih tur dik tak ti kan ni a, hei hi ti lo ila khawvelin min dem ngei ang.

Hetihlai hian India sorkar chuan kan unaute raltlan hi raltlan dik takah (refugee status) a la pawm duh tlat lo a, hei vang hian chhawmdawlna pawh a la pe lo niin a lang a, a zialo hle a ni. Ram leh ram politics chu eng pawh lo ni se, Mizorama Mizote hian ramri lehlama kan unaute hi kan thlahthlam thiang lo a, theih ang tawka kan ṭanpuiin kan thlamuan tur a ni.

Hemi kawngah hian uluk zawka ngaihtuah a, kal zel dan tur hi sorkar level-a rel a hun tawh hle mai a; sorkar anga chet a rem lohnaah pawh tlawmngai pawlte fing taka hmang ṭangkai dan zawn thiam a ṭha ang. Raltlante chhawmdawl hna hi ramri hnai khuate'n an tlin loh hun awm thei a nih reng tawh avangin a ram puma kan chet a ṭul chho dawn niin a lang.