Fing taka thuawih zir a ngai

Covid-19 leng mek avanga Health minister ngenna bawhzuiin Mizoram chhunga kohhran hrang hrangte chuan mipui punkhawm tamna tur buatsaih hrih loh an rel. Tualchhung kohhran ṭhenkhat chuan inkhawm an titawp lailawk tawh bawk a ni. 

Covid-19 hian nunphung a tikhaih­lak nasa a, a tira a lo chhuahna China lama thleng ang ni loa Europe leh hmun dangahte an inven ṭhat loh avanga tualchhunga a darh zel lohna tura inven hi a pawimawh hle a ni. He hri hi awlsam taka rang taka darh thei a nih avang hian fimkhur a ṭul zual a, hemi chungchanga thuneitute'n ngenna leh rua­hmanna an siamte thuawih taka zawm mai hi a ṭha a ni. 

Kohhran tana inkhawm loh rel hi thil harsa ber pawl a nih hmel a, chuti chunga kohhran ṭhenkhatin mipui vantlang himna tur a ni tih hriaa thu an awih mai hi an fakawm hle. Kohhran meuh pawhin inkhawm an ṭhulh tawh lai hian hmun ṭhenkhatah MLA leh sorkar official-te nena vantlang pui­punnate a la awm zel erawh a fel lo a, sorkar hian heng hi ngun takin vil rawh se. 

Mi fimkhur leh thuawihte hian tute emaw fimkhur loh leh thuawih loh vangin an tuar palh thei a, a hri darh zel dan tur hriat a nih miau loh avang hian tun aṭanga thuneitute ruahmanna zawm a, fing taka thu lo awih mai hi mipuiin invenna atana kan tih theih ṭha ber a nih hmel e.