Thuawih loh man kan tuar thei

Khawvel ram hrang hrangah Covid-19 hri a leng mek a, chu chuan khawvel pumpui a tibuai a ni ta ber mai. Mizoram pawh he hri a lo luh lohna tur hian theihtawp chhuahin a inbuatsaih a, ram pawn leh state pawn aṭanga lo hawte chu ni 14 tal mahni inkhung hrang tura thurawn pek an ni.

India ram hmun hrang hrangah zuirna in khar a ni a, Mizo zirlai ṭhahnem tak chu state pawn aṭangin an lo haw a, heng zinga eng emaw zatte hi chu Covid-19 hri len tawhna state-a lehkha zirte an ni. Heng zirlai lo hawte hi ni 14 chhung inkhung hrang tura thurawn pek vek an ni a, mi ṭhenkhatin ṭha taka zawmin chhungkua pawh an inbuatsaih lawk a, zirlai ṭhenkhatte erawh chuan an zawm lem lo niin a lang.

hetiang deuh bawk hiabn hnathawk, sumdawng leh zin khawthawnga Covid-19 lenna state leh ram dang tlawhte pawh ni 14 chhung inkhung tura hrilh an ni a, chuti chung chuan zawm duh lem lote an awm. Mi ṭhenkhat chu biak ina inkhawm ve nghal maite leh leng chhuaka ṭhian kawm zui ve nghal maite an awm bawk.

Heng mite leh an chenpuite hian he Covid-19 hi an hlau lo a nih pawhin an thuawih loh vang hian midangin an tuar thei a, a chhe ber dawnin an zinna lamah hian lo kai palh ta se, inkhung hran loh avanga he hri hi an rawn pu darh a nih chuan an fimkhur loh rah chu he hnam hian a chhietpui thei tih an hriat a ngai.

Sorkar pawhin khauh zawkin heng mite hi enkawl se a ṭha a, thil dang vang ni loin a state pumpui him tlanna tura ke pen ngam a hunlai tak a ni. Hei mai hi a ni lo a, ṭhenawm Myanmar aṭanga mihring lo lut an la awm rengte pawh hi tun aia uluka endik a ngai a, he mi kawnga ramria cheng khawtlang mipui inpekna pawh hian fak a phu khawp mai. 

Tute emaw thuawih loh man tuar thei reng kan nih avang hian, state pawn leh ram pawn aṭanga lo hawte hi inkhung hrang tura tih an nih chhung chu thuawih takin inkhung hrang mai rawh se.