CMRF hi mipui sum a ni

Lunglei District Congress Committee (LDCC) chuan thu­chhuah siamin, Lunglei East bial hmun ṭhenkhatah MNF party-te'n tlawmngai pawlte rawn loin Chief Minister's Relief Fund for Covid-19 aṭanga chhawmdawlna sum an hmuh an sem a, an party mi leh sa induhsakna atan an hmang tih an tarlang.

Chief Minister's Relief Fund for Covid-19 hi mipui thawh­khawm a ni a, mipui sum a ni. Hri­pui dona atana thawh niin a sem hna thawk turin sorkarah an chhung lut a ni ber. Hei hi sorkar pawisa a ni lo a, political party pawisa a ni hek lo a, mamawhna atana hman tura mi thilphalte thawhkhawm niin a thawhtute hi mi hausa leh thil­titheite chauh ni loin nau­pang­in an khawlbawm aṭanga an thawte pawh a tel.

Politics a nih tawh chuan thil hi awih chin tur leh awih loh chin tur pawh hriatthiam a harsa ṭhin. Lunglei lama CMRF sem chungchanga Congress lamin MNF an puhna hi a dik a nih ngai chuan thil zahthlak tak a ni ang. Sorkar aṭanga hamṭhatna lo kalte mahni party tana lo hman hi thil dik lo a nih tawh piah lama mipui thawhkhawm sum party induhsakna atan an lo hmang duh a nih chuan a thawhtu mipui pawisawina hial a tling.

Chutihlaiin mahni party ham­ṭhatna tur zawng chung leh midang beihna rem­chang zawnga thu belhchian dawl loa an inpuh a nih erawh chuan a puhtu lam pawh an demawm lêt ve dawn a ni.

Engpawhnise he thil hi thu dik ni lo hram se, Mizoram mipuite pawisa thawh­khawm hi chu a mamawhte hnen­ah dan dik takin thleng se a ṭha ber a, chutiang taka kalpui a nih theihna turin sorkarin dik leh langtlangin thil kalpui rawh se.