Hri do kawngah tihdik loh kan nei em?

September 13 khan Mizo­ram­ah Covid-19 positive 1,502 hmuh belh an ni a, hei hi ni khata Mizorama hripui vei hmuh chhuah tam ber ni a ni. Hemi ni vek hian Mizoram hi India rama state 28 leh Union Territory pariat zinga hri vei hmuh chhuah tam lamah palina niin hri vei enkawl mek (active case) tam lamah parukna a ni.

Mizoram hi hripui dona kawnga thawk ṭha ber pawlah miin min ngai ṭhin a, hei hi keini pawhin kan inngaihdan a ni a, kan hotute pawhin vawi tam tak nuam ti takin an lo sawi tawh. Keini state tluka Task Force nei ṭha leh chak an awm lo a, kohhran thlengin hripui do kawngah an ṭangin sorkar an thawhpui ṭha a, tha leh sum bakah an hmunhmate pawh hripui veite enkawlna atan hman man awm loin an thawh.

A dotu lam hi nei ṭha viau mah ila hripui vei kan pung zel a - kan do danah thil fel tawk lo a awm nge, a mipuiin kan zir lo fâl bik nge, a khawi laiah hian nge fuh lo awm ni ang? State dangte entawntlak khawpa hripui dona lama thawk ṭhaa inchhal ngam ngat kan nihna kha hman ni lawk a ni a, chutihlaiin mipui cheng tlem berna zinga mi ni chunga India-a hripui vei nei tam ber pawl kan ni chho ta reng mai hi kan inhmeh lo hle a ni.

Hei vang hian kan hotute pawhin hripui kan do dan leh kan enkawl dan hi ngaihtuahna thar nen thlir tawh se, a hmaa inkaihhruaina (SOP) awm sa tlem her danglamin thupek thar chhuah ngawt tawh lo se, mithiamte rawn chungin ruahmanna thar fel tak siam a hun ta. Mi hrang hrang kal khawmin hripui dona kawnga inkaih­hruaina an siamin min thlen chin chu tuna kan dinhmun hi a ni. Chuvangin, a reltu lam insawm zau vak loin mithiam chinin hripui dona kawnga inkaihhruaina hi chu rel tawh se, midang hi chu an rel sa kalpui turin ṭang rual thung ila a ṭha zawk mai awm mang e.