Mizoram Chief Minister Office

Mizoram sorkara Department of Personnel and Administrative Reforms chuan Officer on Special Duty to Chief Minister a ruat thar a, sorkara Secretary tlukpui niin thla khata a lawmman/ hlawh chu Re 1 a ni ang.

Mizoram Chief Minister Office (CMO)-ah hian Chief Minister puitu turin MCS officer pahnih an awm a, anni bakah hian Additional Chief Secretary chuan CMO-ah tho hian office a nei. Hei bakah hian Chief Minister-in a hnathawh tichak turin Adviser pahnih a ruat a, anni pahnih phei hi chu Minister of State rank pek an ni a, CMO-ah hian office an nei bawk.

Hengte bakah hian Chief Minister hnathawhna tichak lehzual turin tunah Officer on Special Duty ruat a lo ni leh ta a, officer zinga a thiam leh sang ber ber Secretary-te nen rank khat an ni dawn. Hei hi sorkar dan ang thlapa ruat a nih chuan an ruat chhan hre loa tawngpawng dodal nghal kher loh pawh a ṭha ang; amah­erawhchu a ruat dan kalhmang leh a hnathawh tur lam erawh mipui hnenah chiang zawka puanzar ni thei se. Chief Minister hnathawh a tihchak sawt theih dan tur leh ram leh hnam tana he officer ṭangkaina tur lam hi hrilhfiah theih chu ni se a lawmawm ngawt ang.

Mizo ṭhalai zingah officer nih tuma bei ngar ngar ṭhahnem tak an awm a, post a tlem tham avangin officer nih tum zawng zawng an hlawhtling vek thei lo a; hei vang hian CMO-a ṭhu tur officer sang tak Secretary tlukpui ni tura a ruata ruat chungah hian kan ṭhalaite mit hi a fu zui deuh a nih pawhin a mak lo ang.

Chief Minister chuan thawhpui tura a duh ang mi hi dan hnuaiah a ruat thiang a, tunah hian kan Chief Minister pawhin thawhpui ṭha tak tak nei tawhin a neih belh zel a, Mizoram tan ṭha zawk leh chak zawkin CMO pawhin hna an thawh phah theih i beisei phawt ang.