Agriculture leh Mizoram sorkar

Agriculture Minister chuan kuthnathawktute tán solar pumping khawl 200 leina sorkarin a pek tawh thu tun hnai khan a sawi a, a senso 50% hi central sorkar tum niin 30% hi state sorkarin a tum dawn a, 20% hi a dawngtute tum tur a ni. State sorkarin 30% a tumna tur thil hi Mizoramah kalpui a ni ngai lo chunga he thil an kalpui theih chhan chu Chief Minister-in kuthnathawktute a ngaih pawimawh em vang a nih thu a sawi.

Mizoram sorkarin kumin financial year atana sum rua­­hmanna a siam­­ah kut­hna­thawktute kaih­hnawih department hrang hrang (Agriculture & Allied department) chuan 3.38% a chang. Heng department panga - Agriculture, Horticulture, Animal Husbandry & Veteri­nary, Sericulture leh Fisheries-a pawisa dah belh khawm hi kan state budget pumpui aṭanga 4% pawh tling lo a nih si chuan he sorkar hian kuthnathawktute hi a ngai pawimawh tak tak em, tih zawhna hi chhan ngai loin a chiang sâ a ni ber mai.

Sorkar hian a ngaih pawi­mawh zawngah chuan sum a dah mai ṭhin a, tuna kan sawi tâk kuthnathawktute'n an belh ve ber tur sorkar department pangaa sum dah belh khawm aia department mala budget-a sum ngah zawk department 10 an awm. Hei hian kan rama kuthnathawktute dinhmun chu chiang takin a sawifiah a tih theih; inthlan dawna a hlawma sum pek min tiamte aiin budget-ah hian kuthnathawktute tán sum dah thei se ramin a ṭhatpui zawkin a rinawm.

Tunah chuan Mi­zoram pum huap pawh ni loa solar pump tlem tham tak leina atana state sorkarin 30% a tum ve pawh kut­hnathawktute duhsak ta viau anga kan sawi mai hian kan sorkar a timualpho lehling zawk a, kan Agriculture Minister ṭhahnemngai tak hi a lungawina a hnim tawh em avangin a lainat­awm ta hial zawk awm e.

Engpawhnise kan ngaih pawimawhah chuan pawisa pawh kan dah mai ṭhin a, kuthna­­thawktute kaihhnawih depart­ment pangaa 3.38% chiah pawisa dah a ni hian engkim a hril chiang viau awm e.