ICU indaih neih a hun tawh

Tun hnaiah Health Minister hoin sorkar mi pawimawh, tlawmngai pawl hruaitute leh kohhran hruaitute chuan Mizorama Covid-19 dinhmun an thlirho. He hunah hian ZMC dinhmun ngaihthlak niin ICU khum 34 leh ward hrang hranga khum awmte a khat deuh reng a, damlo zingah serious an tam a, ZMC-ah thawktu an indaih lo hle a, a bik takin staff nurse indaihlohna nasa zual.

Hripuiin min chen­chilh chhung hi kum khat leh a chan­ve zet a ni tawh a, chuti chunga tun thlenga ICU kan neih zat thlir hian a lungawithlak lo hle. He hripuiin a nuai hmasak ram America leh Europe-ah meuh pawh ICU indaih loh avangin mi tam takin nunna an chân a, India khawpui liante pawhin ICU an indaih lo hle a ni. Hetih chhung zawng hian vanneihthlak takin Mizoramah chuan hripui hi a thawk na vak lo a, kum khat zet chu inbuatsaihna hun ṭha kan nei a, midangte chetsualna aṭanga inzirna hun ṭha tak kan nei a ni.

Mizoramin health infra­structure a nei changtlung lo tih chu tlang hriat a ni a, a tirah khan ram dang angin min nuai se nunna tam tak kan chân ngei ang tih a rin theih. Vanneihthlak takin kan ramah hripui a thawk tlai deuh a, inbuatsaihna leh inzirna hun ṭha kan nei chungin ICU kan indaih khawp pawh siam a ni lo a, Covid-19 dona atan sorkar laipui leh mipui aṭangin sum a lut reng chungin sorkarin budget-ah sum a dah tlem hle a ni. ICU kan neih tlem chhan hi sorkarin pawisa a neih loh vang a nih chuan mipui an lungawi thei hauh lo ang.

Tun hnaiah hriin min nuai na ṭan a, ICU a khat reng a, ICU mamawhte pawh indaih vek theih a ni ta lo hial hi a pawi hle a ni. Tunah ICU ngaihtuah chawp chuk chuk a ni a, hun kha leh chen kan nei chunga ICU-a khum 50 em pawh kan nei lo hi chu a zialo lam deuh chu a ni e.