Volunteer-ah Innghat mai lo ang u

Health Minister, Home Minister, Medical Operation Team Chairman, Chief Sec­retary, sorkar official pawi­mawh te, tlawmngai pawl leh kohhran hruaituten Mizorama Covid-19 hripui leng mêk dinhmun an sawiho a. Sorkarin volunteer 123 lâk a phalsak zinga 26-in an chawlh­san tawh thu leh, anmahni thlaktu tur an la hmuh loh thu an sawi chhuak.

Hripui leng avanga kan harsatna tawh mekin ziaawm lam a pan hleithei lo a, positive hmuh chhuah thar an pun zel avangin sorkar pawh a indaih lo hle. Hetih lai hian hripui vei enkawlna hmun Zoram Medical College lamah thawk­­­tu indaihlohna a nasa niin an sawi a, hei hi a van­­­duaithlak hle a ni.

Sorkarin volunteer lâk phal­na a pek tawh hnuah an ma­mawh zat lâk tur an hmu lo a, an lâk tawh sâ ṭhenkhatin an bansan bawk nen, ZMC lamah thawktu an indaih loin a thawktu awmte pawh an hah tawh takzet niin an sawi. Volunteer hmuh loh avanga damlo enkawl loh ngawt hi thil tih theih a ni lo a, hripui len vanglai tak a nih bawk avangin ruahmanna dang siam a ṭul hle tihna a ni.

Sorkar hian Covid-19 damlo enkawltu volunteer lâk tur a hmù zo lo a nih chuan a hmalak dan ṭhenkhat hi her rem tum se, Health Department hnuaia thawktu nghet nurse, health worker, laboratory lam thawktute leh a ṭul dangte pawh hmun dang aṭangin pawt khawm ta mai se; heng an pawh khawmte awmna lama thawktu tur volunteer hi zawng ta mai se a fuh zawk ang em?

Volunteer lâk thar chawpte hmanga hripui do loin, Health Department hnuaia thawk nghet tawhte hi tun ang din­hmunah hi chuan hmanhmawh takin pawt khawm mai ngam se, an chhuahsan tâk hmun­­ah hian an mamawh a nih chuan volunteer lâk ni zawk ta mai se a kan harsatna tawh mek hi a fel thei mai lo maw?

Volunteer lâk thar chawp turte hmanga hripui hma­chhawn hi a fuh tawk lo a, inzir chawp leh thawktu nghet lote ai chuan a thawk nghet sâ hman ṭangkai ni se, kan damlo serious leh mitthi neih chhoh dan en hian hmanhmawh taka thawktu awm sâ sawi rem tura chet nghal a ṭul takzet a ni.