Thil man to leh sorkar
Commerce & Industries director kaihhruaiin tun hnai khan Aizawla thlai thar man to lutuk chungchang sawiho a ni a; Commerce & Industries leh Horticulture department hotute bakah, Mizoram Consumers Union (MCU) hruaitute leh thlai thar khâr chhâwngtute an tel.
He sawihonaah hian thlai zuartute leh khâr chhâwngtute chuan, diesel/ petrol vàn avangin lirthei hman man a to thu leh, thlai thartute'n tito bik lo se an duh thu an sawi a; thlai tharte mumal zawka a hralh dan tur enpui turin Horticulture leh Commerce & Industries hotute leh MCU hruaitute an ruat.
Tun hma aṭang tawhin Mizoramah hian kawng chhiat leh harsatna dang avanga phai lam thil a luh theih lohin Mizoram chhunga thil awm sa tam tak hi a man an chhiar to vak ṭhin a, dawrkaite leh thlai thar khar chhawngtute hi langsar taka dem kai an ni ṭhin. Kuminah Covid-19 avangin hun rei tak chhung Mizoramin harsatna a tawk a. Ramri buaina avanga harsatna thleng zui leh bawk nen Aizawl khawpuiah thil man a to uchuak ta hle a, Mizoram hmun dangah pawh nitin mamawh harsatna sawi tur a awm ṭan mek.
Thlai man to chungchanga a phurhna senso sang tih hi chhuanlam tling ni bawk mah se, tuna thlai man to chak dan nen chuan thil inzawm a ni thei lo a, thlai man to chak dan leh thlai thar phurhna man san dan hi a inthlau hle ang. State pawn aṭanga kan lakluh pawh ni lo, Mizoram chhunga kan thar chhuah ngeite vawi leh khata uchuak taka a to ṭhin hi a fel lo takzet a, dem tur tam tak an awm chungin sorkar hi huaisen takin inrawlh ngam ṭhin se tun aiin kan ziaawm ngei ang.
Thlai thar zuar chhawngtute pawh hah leh rim taka thlai thar chhuaktute aia hlawk zawka an awm fo avangin a tawpa a tuar bertu chu miretheite an ni. Retheite retheihna belhchhahtu thil man to tur ven (control) hi sorkar mawhphurhna a ni. Miin an thlai thar zawrhte an duh zat zat an chhiar a, an duh ang anga an kalpui phal a nih chhung chu mamawhna (demand) a san apiangin a man a to leh thut zel ang tih hi thil chiang sa a ni.
Tun hmaa ngaimawh hlawh tak, kawng a pin apianga dawrkai ṭhenkhatin thil man an tihto ṭhin zingah state pawn aṭanga bungraw phurhna man zat (printed price) inziakte erawh tun hnaiah chuan an tito thut hran lo a, mumal taka thil man inziak hian dawrkaite pawh a phuar niin a lang.
Kan thlai tharte pawh hi a theih chin chinah mumal taka bûkin an lakna man zat hriat theih ni se, a khar chhawngtute lakna zat hriat a nih chuan an hralh lehnaah a âwm tawkin thlai man a bithliah theih ang.
Mizoram sorkar hian huaisen taka thlai thar zawrh leh hralh hi a enpui ngam a ngai a, thil harsa deuh niin lang mah se a harsat avanga enpui loh leh khuahkhirhna awm miah lo tuar mektu chu miretheite an ni.