ICU-ah rilru sawr bing tawh se
Tunah hian Zoram Medical College-ah ICU khum 34 awmin a khat reng a, hetihlai hian kum upa lam aiin kum la naupang zawkte zingah ICU ventilator support mamawh an tam tawh hle niin sorkar thuchhuah chuan a tarlang.
Kan ram dinhmun thlirin hripuiin min bei na sawt hle mai a, hetihlai hian hripui dona atana kan hmanraw hman rim inkharkhip leh ringawt hian min chhanhim lo tih a takin kan zir chhuak mek a ni. Mi tam tak eizawnna a tihbuai tawh em avangin inkharkhip theih a ni tawh lo tluk a ni. Hei vang hian sorkarin hma thar a lak a ngai a, ngaihtuahna thar nen he hripui hi a hmachhawn a hun tawh takzet a ni.
Covid-19 positive nei thar zel mah ila an zinga na zual bik hi chu an tam vak lo a, chutihlaiin heng mite enkawlna tur lam hi kan sorkarin a din hleithei lo a, a pawi hle a ni. Kum khat leh a chanve inbuatsaihna hun ṭha kan nei chungin khum 34 awmna ICU chiah kan la nei hi a vanduai thlak a; hetihlai hian thu lawmawm tak chu Civil Hospital, Aizawlah Covid-19 hri kaite enkawlna tur ICU khum 10 peih fel a ni tawh a, Pediatrics ICU khum pali awmna pawh zawh fel ṭep niin sorkar thuchhuah chuan a tarlang.
Hripui dona turah hian tih tur ṭul tam tak awm zingah a na zualte enkawlna tur ICU siam belh hi a ṭul takzet a, nun chhan turin kan sorkar hian ṭan a lak a ngai. Hei leh chen inbuatsaihna hun kan nei chunga ICU kan la nei tlem lutuk hi sorkarin mipui nunna a ngai pawimawh lo tia puh theih hial tur khawp a ni a, tun aṭang chuan nunna chhan turin ICU siam belh leh a awm sa thuam ṭhat lamah insawrbing ve rawh se.