Sorkar sum neih loh chhan hi Covid-19 vang nge thil dang vang?

Sorkar laipuiin Covid-19 dona atan budget pawn lam aṭangin ṭanpuina a siam, Covid-19 Emergency Res­ponse and Health System Preparedness Package (ECRP) aṭangin Mizoram sorkar chuan cheng nuai 2,879 a dawng tawh. Heng zinga cheng nuai 886 hi ECRP Phase-I aṭanga a dawn niin cheng nuai 1,900 chu ECRP Phase II aṭangin a dawng tawh.

Ziaka a lan dan chuan sorkar laipui hian ECRP Phase II hnuaiah hian cheng nuai 3,700 chu Mizoram tana pek turin a pawm tawh a, chuti a nih chuan cheng nuai 1,900 min pe tawhin nuai 1800 vel chu kan la dawn belh dawn niin a lang. Hei bakah hian sorkar hian budget pawn aṭangin hripui dona tur sum hi hlawm lian tak takin a dawng nual tawh a, Northeastern Council leh National Health Mission leh hmun dang aṭangin sum hi a dawng tawh.

He mi piah lamah hian hri dona atana mipuiin an thawh khawm hi Chief Minister Relief Fund-ah Rs. 30,22,49,878 (vbc. 30.22) August, 2021 thleng khan a lut tawh a, hei hi pung zel tura beisei a ni. Hei bakah hian a sum fai ni loin damdawi, khawl, test kit, PPE, mask, hand sanitizer leh thil dang ṭanpuina ṭhahnem tak Mizoramin a dawng tawh bawk.

Hetihlai hian kan state budget aṭangin hri lengin a nghawng mi harsate chhawmdawlna sum pek chhuah a nih loh thu Mizoram Chief Minister ngeiin Assembly Session-a zawhna ziakin a chhang a, chuti a nih chuan Mizoram budget-a sum awm sa kan hman tawhna chu hripui dona ngawr ngawrah a ni tihna a ni. Hetianga thil awm dan thlir hian, hna khaihlak chhan leh pawisa awm loh chhuanlama Covid-19 puh fai vek pawh hi chhui chian deuh a ṭhat hmel a, hripui hi leng ta lo pawh ni se kan tih theih chuan loh turah pawh hripui hi puh a remchang zel dawn niin a lang.

State khat ve riang ruang, sum thawh chhuahna lam nei miah lo, chumi kawnga rua­hman­na siam mumal tak sawi tur awm bawk si lo, sorkar laipui aṭanga pawisa sawi chhuak theite Minister chak anga an lanna state kan la ni fo hi a vanduaithlak.

Tuna kan state sum harsatna chhuanlama Covid-19 kan hmanna tam tak hi chhui chiang ila, state sum enkawl fel loh vanga puh theih leh sum lakluhna tur duan thiam loh vanga puh tur hi a awm tel ve ngei a ni.