Sumdawngte harsatna
Mizoram Business Coordination Committee (MBCC) chuan, Chief Minister hnenah dawr hawn chung changa rawtna an neihte an thlen a; state danga an tih angin, Covid-19 vaccine la kim tawhte chu sample endik leh inkhungtir chungchangah duhsakna pe ve turin an ngen. Covid-19 hri léng chu a reh mai dawn a nih loh chuan ni tin inhawn phalsak tur leh, a theih ngang lo a nih pawhin inkaihhruaina zâwm chunga tun aia zinga dawr hawn phalsak turin an ngen a. Lirthei intlàn chhâwk dan chu a hma anga A leh B-ah then leh turtein an ngen bawk.
Covid-19 zet zawng roreltu lam tán rel thiam a harsa dâwn a, a hmaa ṭha kha a lo ṭha lo a, a hmaa ṭangkai kha a ṭangkai zui reng lo a, a hmaa invenna ṭha tak kha hmantlak mang loah a chhuak thei tlat a ni. Covid-19 hri dona atana ruahmanna ṭha kan neih ṭhenkhat hi hripuiin min luhchilh tak tak hma kha chuan a ṭangkai viau a ni thei a, tuna ṭangkai zui ta vak lo a awm thei dâwn tih a lang bawk.
Sumdawngte ngenna pawh hi ngun taka thlir chuan hri lo lut tur laka kan inven lai kha chuan ngen âwm pawh niin a lang lo a, tunah erawh chuan hripuiin min luhchilh tawh tho avangin a hranpaa hri lo lut tur venlai ang maia inkaihhruai chu a fing ber tawh kher lo ang.
Dawr hi nitin inhawn leh inhawn lohin hri tam leh tlem a hril tawh kher lo mai thei a, chutiangin lirthei tlan dan tihdanglam pawhin hri hi a veng seng tawhin a lang lo. Hei bakah hian zan lam curfew la kalpui tlatte pawh hi hri venna aiin sualna veng kan ang chho ṭan lek lek tawh zawk a, hman ni lawka hri darh tur venna ṭangkai kha tunah chuan a boruak a lo danglam zo ta.
Engpawhnise sumdawngte pawh hian anmahni thlirna aṭanga thil tih âwm taka an ngaih an thlen a, hei hi thlirna kil hrang hrang aṭanga thil ṭha ber a ni lo ve thei bawk; sorkar chuan mipui vantlang tana ṭha ber thlirin ro a rel tur a ni a, tuna ruahmanna kan neih mêk hi chuan hri darh zel tur a veng hneh lo hle tih a chiang tawh. Chuti a nih chuan, 'kalphung ngai pawh sei' ringawt lo deuha thlir a hun tawh a, sumdawngte rawtnate pawh hi kan mil tawk a lo ni tawh zawk thei a ni.