MPCB Chairman

Mizoram Pollution Control Board (MPCB) chairman R Thanga chuan Principal Chief Conservation of Forest hnenah a nihna aṭanga bànna a thehlut. R Thanga hian bànna a thehluhah, "Ni 3.8.2021-a MPCB Chairman atana ruat a nih danah ngaihdan inang lo ṭhenkhat a awm avangin, sorkarin dan ang taka an chinfel theihna atan bànna thehluh hi ṭulin ka hria a ni," a ti.

He thilah hian thu inkalh chiang tak mai a awm a, chu chu MPCB Chairman ruat dan chungchang hi a ni. He thilah hian Mizoram rorelna in sang ber leh zahawm ber tura ngaihah Environment, Forest & Climate Change changtu Minister chuan MPCB Chair­man chu recruitment rules awm hmaa ruat niin a sawi a, hei vang hian tehna ṭhenkhatah tling lo mah se, a tehna tur ber (recruitment rules) siam hmaa ruat a ni, tih hi a ṭanna a ni.

Hetihlai hian sorkar docu­ment lama a lan dan chuan, Govt. Gazette notification-a recruitment rules tihchhuah hnuah MPCB Chairman hi ruat a ni thung a. Chuti a nih chuan recruitment rules-a tehna ṭhenkhata tling lo chu MPCB Chairman-ah ruat niin a lang ta a ni. Hei vang hian Mizo Student Union lam chuan thuchhuah siamin MPCB Chairman ruat thar chu dan anga ruat a ni loa ngaiin, MPCB chairman aṭangin September 24, 2021 ral hmaa báng turin an phût a ni.

Innawr buai leh inauh buai ngai loa MPCB Chairman-in a nihna aṭanga banna a thlehlut fel mai hi thutlukna puitling tak a ni a, nihna duh luat avanga dan pela inham tan hram a tum lo leh, buaina pumpelh zawnga hma a la hi a lawmawm hle a ni. Hetihlai hian ngaihtuah zui ngai ta chu Assembly House-a Environment, Forest & Climate Change Minister thusawi hi a ni. MPCB Chairman ruat danah hian thu dik a lang chho ta nia a lan rual hian thu dik lo pawh hai lan a ni tihna a ni mai em?