Raltlan leh sorkar inkar

Chief minister Zoramthanga chuan amah kawmtu Steering Committee for Myanmar (SCM), Lunglei hruaitute hnenah Myanmar ráltlânte mamawh leh dinhmun DC-te'n sorkarah an thlen theih loh avangin sorkarin ráltlânte tan duh angin hma a la chak thei lo tih sawiin, "A mawhphurtu DC-te ka dâwp chhuak thei lo a ni. Ráltlânte dinhmun leh mamawhte ka hnena thlen tura vawi tam ka tih hnuah pawh DC-te'n an la thlen thei tlat lo. Sorkar ang chuan DC-te hi kan rinráwl ber an nih a ngai si a, anni'n report min pek theih si loh avangin hmalak dan thiam a har," a ti.

CM sawi anga DC-te'n ral­tlante dinhmun hi sorkarah an report lo tak tak emaw, sorkar hian raltlante dinhmun hi a hre lo tak tak emaw a nih chuan he sorkar hi a mualpho tihna a ni ang a, raltlan tam takin Mizoram an lo luh tawh thu leh an thlalak thlenga media lama hmuh tur a awm hnuah sorkar hian a la hre lo a nih chuan a mualpho hle tihna a ni.

He thusawiah hian mi tam tak chuan CM leh a kaihhruai sorkar hi an dem a; nimahsela a phenah hian thil dang a awm zawk niin a lang a, ram pahnih inkar thilte a nih avangin state sorkar tana ke pen a rem loh dan a awm ve thei a ni. Thlir dan dang aṭanga thlir chuan raltlante hi ṭhenawm ram Myanmar aṭanga rawn lut an nih avangin India sorkar chuan tun thlengin refugee status pawh a la pe duh lo a, hei hi refugee anga lo tuam hlawma sorkar anga lo buaipui chiam hi a la rem lo palh a ni ve thei bawk.

Chuti chung chuan sorkar hian kut leh ke tam tak a nei tho a, Task Force hmangin Covid-19 pawh a do thei a ni. A duh phawt chuan tlawmngai pawl hrang hrang kal tlangin kan unau raltlante ṭanpui dan ruahmanna hi a siam thei a, he ruahmanna hi puangzar lem loin a lo kalpui tawh zawk pawh a ni thei. Kan unaute mangangin min rawn bel a, kan state sorkar hian a hmu lo derin a hre lo der lo ang tih ring ila, a remchan danin ṭanpuina pawh a pe chhuak ngei turah i ngai phawt ang.