Health Minister mawh a ni bik em?

Mizoram Pradesh Congress Committee chuan Mizorama Covid-19 hripui a pun zel chhanaa mawhphurhna hlen zo loah Health Minister leh Medical Operation Team Chairman-te chu an puh a, hetihlai hian Chief Minister chu Covid-19 do kawngah sawisel tur an hriat loh thu an sawi. MNF chuan hei hi chhângin Covid-19 kiam theih loh chhanah mimal anga indemna chi a ni lo, tiin Health Minister leh MOT Chairman-te thawhrimzia an tarlang a. Congress party chu hripui hmanga politics khel lo turin an hrilh.

Hripui a len tirh lam khan Mizoram hi a ziaawm ber zinga mi kan ni a, hri kai an tlem bakah thihpui pawh an tlem a, sorkar fakna aw ki pawh a ring hle. Health Minister leh MOT Chaiman-te ngei pawhin fak an hlawh a, kan Minister leh MLA-te pawhin CM hmalakna an fak. Chief Minister Pathian ṭih vang tih lam hawia ṭawng chhuakte pawh an awm a ni awm e. Khatihlai khan hming ṭhat hlawhin mipuiin kan ram hruaitute an lo fak tawh a, tunah erawh hripui do kawnga kan dinhmun a chhiat tak avangin sawiselna pawh a ri ring ta hle.

Political party lam hi chuan mahni tana ṭha tur leh khingpuite chhiatna lam hi an zawng thiam a, Health Minister leh MOT Chiarman-te na taka an dem laia ṭum danga an sawisel fo Chief Minister chet dana sawisel tur an hriat loh chu Congress lamin an sawi chhuak teh tlat hian politics-a hêm thlak tumna a awm niin a lang.

Zêp thu a chêng lo a, CM leh Health Minister inkar boruak hi a ṭha vak lo niin titi a tam hle a, he boruak chhem alh tur tawkin pakhat zawk demin pakhat zawk an rawn fak a ang.

Covid-19 dona kawnga sorkar thil­tihah fak tur an awm a nih chuan sorkara mawhphurtute hi fak tur an ni ang a, sorkar hmalakna/ hma lak lohnaah sawisel tur an awm a nih pawhin anni tho hi an ni ang. A mimala tu emaw fak bik leh sawisel bik neih hi thil kalphung ni loa puh tur ni em lo mah se, tu emaw vanga hripui hi pung a ni lo a, a lo kiam ta a nih pawhin tu emaw vang a ni bik awm lo e.

Engpawhnise kan state budget-a Health Department-a pawisa an dah tlem ta sawt te, hripui len hnu budget-a Health department chan a tlem ta daihte leh hripui len lai ṭul vanglaia Health Department an audit chûk chûk maite hi hriatthiam a har a; MNF party thuchhuahin kan zavaia ṭang rual tura min sawm lai hian chik taka zir chuan an party chhung ngei pawh hi a an ṭang rual ṭha tawk lo a ang fo a ni.