Hnam dang hming hawhtir

Mizoram Merchant Asso­ciation (MIMA) huai­hawtin tun hnai khan Zarkawt leh Dawrpui Local Council-te leh Kuhva Zuar Association hruaitute an inhmu khawm a, sumdawnna atan hnam dang hming hawhtir tawh lo turin Mizo mipui an ngen.

Khawvel hma­sawn zelah hian hnam bila awm hran leh hnam dangte nena sumdawnnaa indawr tawn loh hi thil theih loh tluk a ni a, hetihlai hian hnam dang hnena mahni hming hawhtir kher loa kal hi chu thil theih a ni. Mahni hlawkna um avanga hnam dang sumdawnna kawng hawnsak hi hnam phatsanna ang hial a ni thei a, hemi kawngah hian Mizo mipui kan ṭhan harh a hun ta hle.

Tlem lai deuh khan hnam dang dawr ni ngeia hriat chu zirlai pawlte leh MIMA hian na takin an lo dodal tawh a; nimahsela 'an zuar tlawm' tih changchawiin hnam dang ta a nih leh nih lohna lam fiah duh loin mi ṭhenkhatin kan tawngpawng ṭan chiam tawh a, sumdawnna kawnga kan ram leh hnam humhim duhtute chu kan dem lêt lek lek tawh a nih kha.

Tuna hnam dang hnena hming hawhtir hian sum­dawnna tenau nia lang chauh hi huam lo se, an rel ang hian huam zau zawkin hnam dangin Mizo hming hawha sumdawnna an kalpui hi zawn chhuah vek ni se, hnam dangte dan loa Mizorama an sumdawn hi i phal lo ang u.