Mizoramah hri kai an pung zel Engtin nge kan kal zel dawn?

September 27, 2021-a India rama Covid-19 positive thar hmuh chhuah tamna ber chu Kerala a ni a, a dawttu chu Mizoram a ni. He mi ni hian Mizoramah hripui vei mi 1,846 hmuh chhuah an ni a, hei hi ni khat thila Mizorama hripui vei hmuh tam ber ni a ni.

He mi ni tak, September 27 hi India rama Covid-19 positive hmuh chhuah tlem ni a ni ve thung a, March 11, 2021 hnua positive hmuh chhuah tlem ni ber a ni. India rama ni 200 chuang chhunga positive hmuh chhuah tlem ni taka Mizorama hmuh chhuah tam ber ni a lo ni chiah hian ngaihtuah a tithui a, India ram hmun danga hripui dinhmun a ziaawm tawhlaiin kan ramah a la hluar hle tih a nemnghet.

Covid-19 dona kawnga kan beih dan enin kan tiṭha thawkhatin a lang. Sorkar lam pawh a chang chuan an inchhuang ve deuh hman hial ṭhin a, hripui beih letna kawnga kan tihṭhatzia hi an sawi ṭhin a ni. A tak takah erawh chuan lockdown chi hrang hrang kalpui rei ber kan ni chungin hripuiin a chenchilh rei ber pawl kan ni ta a, eizawnna chhunzawm hleithei loa kan inkhuahkhirh nasat ngaihtuahin a hri darh tur ber erawh kan khuahkhirh hleithei ta lo.

Kan kal zel dan tur hi sorkar tan pawh ngaihtuah thiam a harsa tawh dawn a, kan nih nih ni law law tura inhlahdula inhawn zau mai a ṭha ber si lo ang a, thapui thawha inkharkhip ṭha leh turin kan dinhmunin a zir si lo. Khawvela mihring chen tamna rama a mihring nei tlem ber pawlin hripui vei kan nei tam deuh ber mai hi a manganthlak a, kan kal zel dan turah ruahmanna siam thiam a harsa ang.

Engpawhnise hripui a leng a, a hmachhawn dan leh inenkawl danah hetiang lama thiamna neite thu zawm thiam ila, sorkar leh khawtlanga mi pawimawh leh nihna nei sang zawng zawngte nena rel hup hup loin kan kal zel dan tur hi chu mithiamte kutah huaisen takin i dah tawh ang u khai.