District tinah RT-PCR
Health Minister chuan Mizorama district zawng zawngah sorkarin RT-PCR laboratory a din dawn tih a puang a; Civil Hospital, Aizawlah ICU din belh a nih thu a sawi a, ICU thara thawktu tur nurse 50 lak dan sorkarin a ngaihtuah mek thu a sawi bawk.
Tun dinhmunah Mizoram hi India rama Covid-19 hri kai an pun chak berna zingah a tel mek a, chutihlaiin India ram state leh union territory zingah Mizoram aia RT-PCR laboratory nei tlem an awm lo. Mizoram pumah RT-PCR laboratory sorkarin pakhat chiah a din a, Lungleia hman tur RT-PCR an pek hnuah pawh laboratory din a hautakzia hlir sawiin an din duh lawk lo a, mipuiin High Court-ah sorkar chu khingin tihluihnain laboratory hi din an tum mek a, chutah pawh an muanchan avangin High Court lamin sorkar hi a tur lui mek a ni.
Chu sorkar bawk chuan tun hnaiah, Tuirial biala bye election puan a nih hnuah district tina RT-PCR laboratory din tum a nih thu a puang leh thut a, a hmaa laboratory pakhat bak siam belh thei lo leh a harsatna hlir sawi ṭhin khan a huphurh leh ta lo thut a ni.
Zep thu a cheng lo, Lungleia RT-PCR laboratory din a nih theihna tura sorkar ngeiin a tirh mithiamte pawh mithiam an nih loh dan sawia an thil hmuhte pawm duh lo tawhtu sorkar kha a ni a, chu sorkar chuan district 11-a RT-PCR laboratory din a theih tiin din ngei an tum leh ta a ni.
He thil kal vel dan hi Mizo mipui zahlohna leh mipuite hriselna politics khelhna hmanruaa hman luihna ang mai a ni a, a pawi hle. RT-PCR laboratory din leh din loh hian mihring thih leh dam chungchang thui takin a hril mek a, chu thil din a harsatzia sawitute'n tuna taka RT-PCR laboratory din an huphurh leh ta miah lo hian a hmaa chhuanlam an siam kha chhuanlam a tling ta lo tih a lantir a tih theih hial ang.
Engpawhnise district tina RT-PCR laboratory din tumna awm hi a lawmawm a, chutih rualin Covid-19 hri darh zel dana India rama kan mualpho hun nghak thlenga bye election puan hnua district tina RT-PCR laboratory din tum a nih thu an puang leh hnuhnawh hi chuan ngaihtuah a tithui takzet a ni.