Zangnadawmna leh kawngpui

Vairengte leh Sairang inkar kawngpui, National Highway 06 leh 306-a zawngnadawmna dawngtu turte NHIDCL lamin an la tifel lo a; Competent Authority for Land Aqui­sition chuan zang­nadawmna chung changah preliminary survey an zawh tawh thu a sawi rualin a project chu a la final loh thu a sawi.

He kawngpui zauh tur chungchang hian sawi a hlawh a, a ram neitu dik tak ni lo zangnadawmna beiseia tun hnaia ram lei tur zawng leh buaipui an tam hle tih sawi chhuah a ni. He kawngpui zauh tur leh zangnadawmna pek chhuah tum danah hian political party hrang hrang leh politician-te pawhin an ngaihdan an sawi chhuak tawh a ni.

Mizorama kan buaina lian tak chu project lian tham kalpui a nih dawn apianga zangnadawmna chungchanga buaina awm ṭhin hi a ni. Tuna kawngpui zauh turah pawh hian a ram neitu dik tak ni lo, kawngpuiin a paltlang dawn tih hriat avanga ram lei thar tam tak an awm a, a ram lo nei tawh sa zingah hralh chhawngte pawh an awm nual tih phat rual loin a lang.

He project lian tak kalpui tur hi zangna­dawmna avangin buai lo se, a ziakah felin zangnadawmna dawngtute hi chhui hleihtheih lohin a tirah awm mah se, thil dik tawk lo leh fel fai lo a awm palh a nih chuan hai chhuah theih loh a awm dawn lo a, tute emaw hming hawha zangnadawmna beisei khawpuia mi liante pawh inthiarfihlim ngam se a ṭha ngawt mai.