Kan himna, kan kutah

Mizoram sorkar chuan Covid-19 hripui leng avanga inkhuahkhirhna tam zawk chu thlahdulin awm dan tur thar (Standard Operating Procedure) a duang leh a, sorkar pisate a pangngaiin a kal leh tawh dawn a, dawr hrang hrangte pawh nitin an inhawn phalsak an ni ta.

A sawi uar deuhte sawi danin Mizoram hi khawvela lockdown kalpui rei ber kan ni awm a; nimahsela chu chuan hripui leng tur a dang zo bik lo a, Mizorama min nghawng na tur erawh a tikhaw­muang (delay) hlek niin a lang. Hei tak hi sorkarin inbuatsaihna hun remchangah lo hmang thiamin lo hmang duh se hri kai enna khawl ṭha zawk bunna hun ṭha, ICU tam zawk siamna hun, thawktu ṭhahnem zawk lakna hun remchang leh Health depart­ment-a sum tam zawk dahna tur a ni a; amaherawhchu heng kawng hrang hranga sorkar chet duh dan leh chet duh loh dan chu a takin kan hmu.

Rei tak chhung inkhuah­khirhna hrang hrang kalpui a nih hnuah hripui lengin zual lam a pan zel a, ICU kan neih chhunte a khat reng a, a khat tawka hripui avanga thi kan nei reng chungin hripui avanga inkhuahkhirhnate thlahdul lo thei lo dinhmunah kan ding ta tho a ni ber. Heng inkhuahkhirhna leh inkaihhruainate thlah dul a nih chiah hian mimal tin hi kan pawimawh zual dawn a, kan himna hi kan kutah a awm thui lehzual dawn ta a ni.

Sorkarin hripui hi min vensak tumin theihtawp a chhuah a, a thlen chin chu tuna kan hmuh ang hi a ni. Tunah chuan sorkar pawh a tlawm ta a ang lek lek a, mipui khawsak harsa chho mek leh hripui ven hneh a nih bawk si loh avangin nunphung pangngaia kir leh turin ruahmanna a siam ta.

Kan himna hi a hma zawng aiin kan kutah a awm lehzual dawn a, sorkar a inhawng zau ta hi dem mai loin mahni lam inkhuahkhirhin inthunun ila. A ṭul tawpah lo chuan pawn chhuak lo ila, kut sil leh hmai tuam a pawimawh tih hre thar ila, keimahni leh kan bula awmte an him theihna turin mi tinin mawhphurhna kan nei e.