CM leh Health Minister inkar

Health minister chuan Covid-19 boruak chu politics-a inbeihna atan hman a duh loh thu a sawi a, Mizoram chief minister nen an inkar boruak a ṭhat thu a sawi a, chief minister-in Health department mamawh thilphal taka a pek ṭhin thu a sawi. 

Mizoram leh India ram mai ni lo, khawvelin hripui hlauhawm tak avangin buaina leh harsatna a tawk mêk a, kan zavaiin kan buai tlâng a ni. Hetihlaia politics-a hlawkna lo ûm bîk emaw, politics lama midangte beihna remchang hman hi a ṭha lo takzet a ni. 

Chief  minister leh Health minister inkar boruak hi eng ang tak nge tih hriat ni lo mah se, Health minister berin boruak ṭha tak an neih thu a sawi hi pawm mai a ṭha ang.

Health minister berin,  "Kan CM nen hian kan inzuina a rei tawh a, ani tluk an awm lo. Kan inthláwp ṭha lutuk," a tih hi thil chiang kan hriat theih chu a ni a, politics thila Health minister leh chief minister inkara buaina awm ang lek leka an puhna chiang takin a rawn sawi fiah ta a ni. 

Health minister-in thil awm dan a puang tawh a, "Kan in thlawp ṭha lutuk," tia CM nen an inkar a sawi fiah tawh hnu hi chuan hri len chhung chu he thu hi sawi zui lo ila, eptu party lam pawhin umzui hrih lo se a ṭha awm e.