Mizoram pum CM nge ruling CM?

MNF president leh Chief Minister ni bawk Zoramthanga chuan, tun hnaia Tuirial bial bye election campaign-naah Tuirial bial mipuite chu eptu lam an thlan tlin chuan, 'Kan tihfuh loh pawl tâk,' an la tih ngei ngei tur thu a sawi.

India rama state pakhat kan ni ve a, chumi enkawltu tur chu kum nga danah mipuiin an thlang ṭhin a, tuna Mizoram enkawltu tura thlan tlin chu MNF party an ni. Thawh chhuah mumal tak sawi tur nei mang lo state kan ni a, hei vang hian Mizoram chhunga Mizo mipuite in­enkawlna tur sum pawh sorkar laipui min pek a ni. Heng sumte hi political party tan an rawn pe lo a, Mizoramin hma a sawn theihna tura Mizoram tana an rawn pek a ni a, chu Mizoram sorkar sum leh pai enkawltu chu tunah chuan MNF kaihhruai sorkar a ni.

Hmasawnna tur sum lo lutte hi tu pa sawi chhuah emaw a ni hranpa lo a, a ruh langa sawi chuan kan thawh chhuah pawh ni loin mipui tana sorkar laipui aṭanga a dawna kan dâwn a ni. Heng kan sum lo lutte hi khawi bial emaw MLA awmna party azira pek leh pek loh chi pawh a ni lo a, mahni awmna party an nih loh avanga chu bial chhunga cheng Mizo mipuite hrek duhtu sorkar kan neih chuan a vanduaithlak hle ang.

Kan ram hruaitute pawh hian an enkawl Mizoram leh a chhunga cheng mipuite hi 'ram hruaitu' an nihna aṭangin thlir ṭhin se, 'political party hotu' ang chauha thil an thlir ṭhin avangin Mizoram hmasawnna tur lo kal pawh party miten an insem titih mai ṭhin a, hei hi a vanduaithlak hle a ni.

'Khawi party mi pawh ni ula, Mizo­ram chhunga mi chuan hmasawnna sum leh pai lo kalte hi in dawng ang,' ti zawnga thlirtu mipui hmangaihtu ram hruaitu kan mamawh khawp mai. Mahni party mi ni lo chu a chhung leh khatte pawh ngaihsak loh thu sawi ngat tawhtu CM-te kan nei tawh a, mahni party MLA ni lo an thlan tlin chuan an inchhir tur thua vau duh CM kan nei leh mêk. Khawi party mi tán pawha ram hruaitu nih tling, mahni party mi leh sâ an nih loh avanga ngaihsak lo zui mai ṭhin tur ni lo, Mizoram chhunga mi zawng zawng tana hruaitu nih inhuam ram hruaitu neih theih a duhawm ngawt mai.