Bamboo road

Mizoram Lok Sabha MP leh Rajya Sabha MP-te chuan tin hnai khan DoNER Minister an kawm a, Mizoram Chief ruahmanna anga Mizoram chhunga bamboo road a tam thei ang ber laih a ṭul tawh thu an thlen.

Mizoram sorkar flagship programme chu mau/rua a nih thu kan Chief Minister hian a sawi tawh a, hei vang hian bamboo road a ngai pawimawh pawh hi a inhmeh hle a ni. Mau/rua hi Mizoram economy chawi kanna atan kan sorkar hian hman a tum a, chuvangin bamboo road siam hi a hmanhmawhthlak tawh takzet a, kum nga chhungin mau aṭanga hlawkna hmuh hman dâwn chuan bamboo road siam tum a la ni chauh mai hi a tlai lek lek tawh zawk a ni.

Thawk khatlai khan Mizoramah hian bamboo link road hi nasa taka laih a ni a, kha'ng kawngte kha a laih a ṭha tawk lo nge, lai anga an insawina hmun ṭhenkhatah khan an thawk tak tak lo nge, tun hnu hian a sulhnu chhui tur a vang pharh mai. Mau hmanga kan intodelh dâwn a nih ngai chuan mau chinna tur hmun kalpawhna tur leh a mau thiar chhuahna tur kawngpui laih hi thil ṭul tak a ni a; nimahsela tute emaw sum siamna awlsam ang leka kawngpui zawh zui hleihtheih loh leh belhchian dawl lo lutuka laih tawh loh ni se a ṭha hle ang.

Kan sorkar hian mau/rua hmanga intodelh a tumna lamah hian kan rama awm sâ lam aiin a lakluhin bul min ṭanpui a, chumi hnuah kan rama raw awm sâ ang tho chu an han ching chawp leh a, a raw chi supply turte an tender-na pawh a la rei lo. Hengte hi hlawhtling taka an ṭhang puitling thei a, kan bamboo road buaipuite sorkar laipui lamin min pawmsak bawk chuan mau/raw hmanga sum lakluh hi kan sawi ngam dâwn chauh a nih hmel a; mau/rua chingtu lam aiin bamboo road laitute'n kan sorkar flagship programme hi an hlawkpui zawk palh mai ang tih hlauhawm tak a ni.