Covid-19 do danah Ko kan thlak dawn ta

Mizoram sorkarin Covid-19 do dan zir chiang tura a ruat, State Level Expert team on Covid-19 chuan hripui do danah rawtna thar ṭhahnem tak a siam a, Mizoram sorkar pawhin a pawm. Expert lam chuan kan ram dinhmun enin lockdown avanga hripui kai dinhmun a tlakhniam chuan loh avangin ṭul bik thil eng emaw tak a thleng a nih loh chuan lockdown tawh loh an rawt.

Covid-19 do dan ṭha ber hi ngaihtuah chhuah thiam a harsa hle tih chu Mizo­ramin a takin kan tawng mek a, sorkar thuneitu lam pawh an hahin an rim tawh takzet. A tirah hripui vei pahnih khat an awmin khauh zetin kan inkhuahkhirh a, thawh khatna (first wave) lamah chuan state dangte entawntlak kan nih thu chhuang takin kan sawi ngam phah hial a ni.

A thawhhnihna lamah erawh kawng hrang hrangin ṭan la mah ila Covid-19 in a tihbuai ber pawlah kan state chu a lo ṭang ve ta reng mai. Tun thlengin nitin mi sang chuang positive hmuh chhuah thar an nih piah lamah thihpui an awm chho ta deuh reng mai. Thuneitu lamin total lockdown leh partial lockdown-te nen ṭan an han la a, awmzia a nei tak tak lo tih a takin kan tawng mek a ni.

Tuna pawimawh ber chu nun chhan hi a ni a, a na zual enkawlna tur ICU tam zawk buatsaih a, hnathawktu lak belh a, inenkawl tura inrin hi kan tih theih chu a ni ta deuh ber mai. Hei hi kan duhthlan ni loin kan dinhmunin a zir tawh loh avanga pumpelh theih tawh loh a ni mah zawk. Tunah chuan inkhuahkhirhna awm vak tawh loa hripui kan hma­chhawn hun kan thleng ta nge nge a ni.

Sorkar leh thuneitu lam hi demna tur kan zawn chuan dem theih an ni tehmeuh a, an tih tur an tih loh leh an tih loh tur an tih pawh a tam; nimahsela tunah chuan hripui do dan ko thlak a ni dawn a, a hmaa tihsualte hre reng loin fimkhur tura infuih nasa lehzual chungin, hripui do dan tharin i do tlang teh ang.