Sorkar hna lâk

Health department hnuaia Zoram Medical College (ZMC) a contract-a thawk tur staff nurse 50 lakna tur atana interview result chu tihchhuah a ni a; result-ah hian volunteer-a nurse thawk mekte an lungawi lo a, Chief Minister hnenah hna lâk hi ennawn turin an thlen. Pawl hrang hrang pawhin ZMC-a nurse thawk tur lâk hi a felfai tawk lo tiin ennawn leh turin sorkar an ngen bawk a ni.

Mizoramah hian sorkar hna hi hna tling bika kan ngaih vang leh, hlawh chungchangah an ṭhat fal bîk avangin mi tam tak tinzawn ber a ni. Mizoramah hian nurse zir chhuak tawh, sorkar hna beisei ringawt pawh an ṭhahnem hle a, tun ṭuma con­tract hna lak tur pawh mi 1,000 chuangin an dil a ni.

Hei hian sorkar hnaa kan ṭhalaite an innghah thuizia chiang takin a lantir a, chumi piah lamah chuan sorkar hna lâk dan dika kalpui a ṭulzia pawh a tichiang hle. Miin an dam chhunga an thil tum ve ber hi tute emaw induhsakna mai mai vangin an chân ve palh thei a, chhungkaw chawmna tur tia hah taka an lo zir hi political party thil avangin a thamral thei - hei vang hian dik leh fel taka sorkar hna lâk hi a ṭul takzet a ni.

Tun ṭum thil thleng bikah hi chuan sorkar lamin thu delhkilh neiin 'volunteer' a lo la tawh a. Covid-19 hripui leng kan hlauh vanglai leh a thawk nghet sate pawhin a theih chhung chu ZMC-a post loh an duhlaiin nurse eng emaw zat chu an in-volunteer a, hei hi an inpekna piah lamah lâk an nih dawna sorkar lamin duhsak tura intiamkamna ziaka an dah ngam vang hi a ni ngei ang.

Sorkar chuan a hnuaia thawk tur nurse chu a la dawn ta ngei a; nimahsela volunteer-te hmaa ziaka a lo intiam tawh volunteer-te duhsakna chu an lantir leh ta si lo a, volunteer ni lo nurse tam zawk a la leh si a ni.

Sorkar hna lâkah induhsakna a awm ṭhin tih titi awm hi thleng dik nawn tawh lo se, sorkar pawhin a tisual a nih chuan a tihsual pawmin dik takin hna lâk hi kalpui leh se a ṭha ber ang.